Venus gengur þvert á sólina

Þverganga Venusar sást víða um land í dag, en þetta er fyrsta skipti í 122 ár sem þetta fyrirbrigði sést frá Jörðinni. Þverganga Venusar er það nefnt þegar Venus gengur á milli Jarðar og sólu, samanber tunglmyrkva. Enda þótt Venus sé álíka stór og Jörðin svipa áhrifin þó ekki til tunglmyrkva, vegna fjarlægðar frá Jörðinni. Engu að síður hefur fólk fylgst með þvergöngunni um allan heim í morgun, sem er kannski ekki að undra, þar sem Venus gekk síðast fyrir sólu árið 1882. Ólíkt sólmyrkva þegar tunglið gengur fyrir sólina, sem varir aðeins í nokkrar mínútur, tekur þverganga Venusar 6 klukkustundir. Það var 19 mínútur yfir fimm í morgun sem lítill hringlaga blettur tók að skyggja á sólina, en svo færðist bletturinn rólega þvert yfir sólina þar til nú klukkan 23 mínútur yfir 11, að hann hvarf aftur. Svarti blettur Venusar virtist agnarsmár, enda er þvermál sólu 109 sinnum stærra en þvermál Venusar. Hér á landi virðist þvergangan hafa sést best á suðurlandsundirlendi. Snævarr Guðmundsson, formaður Stjörnuskoðunarfélags Seltjarnarness, ók um Suðurland í morgun til að berja gönguna augum í gegnum öflugan stjörnusjónauka. Í samtali við fréttastofu sagðist hann hafa séð lofthjúp Venusar, en það var einmitt vegna þvergöngu fyrir sólu, sem menn uppgötvuðu að Venus væri hjúpaður lofti. Stjörnuáhugamenn víða um heim hafa fylgst með atburðinum en þetta einstaka sjónarspil hefur blasað við fólki í Evrópu, Afríku og Mið Austurlöndum, þar sem léttskýjað var á mörgum svæðum. Þá sást þvergangan vel í Ástralíu, svo dæmi sé nefnt.