Vill aðhald í ríkisfjármálum

Starfsgreinasambandið óttast að ríkisvaldið ætli ekki að axla þá ábyrgð í ríkisfjármálum, sem sé nauðsynleg á næstunni vegna aukinnar verðbólgu. Sambandið segir að ríkisvaldið verði að beita skynsamri og ábyrgri hagstjórn á næstu misserum, þannig að koma megi í veg fyrir að Seðlabankinn hækki vexti um of og þrengi þar með að heimilunum og fyrirtækjunum í landinu. Nýlegt fjárlagafrumvarp bendi ekki til þess að ríkisvaldið muni axla þessa ábyrgð. Starfsgreinasambandið skorar jafnframt á fyrirtækin í landinu að halda aftur af verðhækkunum á næstunni og á hið opinbera að halda aftur af gjaldskrárhækkunum, þar sem verðbólga fari hratt vaxandi og lítið megi út af bera til þess að hún fari úr böndunum.