Siv hverfur úr ríkisstjórn

Siv Friðleifsdóttir hverfur úr ríkisstjórn 15. september. Hún er ekki sátt við það og telur ákvörðun þingflokksins brjóta í bága við nær öll möguleg viðmið. Halldór Ásgrímsson, formaður Framsóknarflokksins, boðar frekari breytingar á ráðherraliði flokksins vorið 2006. Þingflokkur Framsóknarflokksins kom saman síðdegis til að ákveða formlega hver ráðherranna sex skyldi víkja þegar Halldór Ásgrímsson tekur við forsætisráðuneytinu. Fundurinn var ekki langur enda niðurstaða svo sem ákveðin fyrirfram; Siv Friðleifsdóttir verður óbreyttur þingmaður á ný. Halldór Ásgrímsson segist jafnframt hafa tjáð þingflokknum að a.m.k. ári áður en kjörtímabilinu lýkur muni hann gera tillögu um breytingu á ríkisstjórninni af hálfu Framsóknarflokksins, ef hann fengi til þess stuðnings þingflokksins. Það hafi hins vegar ekkert verið ákveðið nánar í því sambandi.       Halldór segir ríkisstjórnina munu sakna Sivjar en það hafi verið ákvörðun þingflokksins á sínum tíma að sækjast eftir því að leiða ríkisstjórnina og því hafi lengi legið fyrir að fækka þyrfti í ráðherraliðinu. Formaðurinn segir Framsóknarflokkinn vænta mikils af Siv, hún hafi staðið sig frábærlega vel þau fimm ár sem hún hafi gegnt embætti umhverfisráðherra og muni vinna áfram á vettvangi þingsins og flokksins þar sem kraftar hennar muni nýtast vel. Aðspurður um hvernig atkvæði féllu á þingflokksfundinum segir Halldór það aldrei upplýst í þessu sambandi en segir ágæta samstöðu hafa ríkt um niðurstöðuna. Spurður hvernig Halldór réttlæti að Siv sé látin fara þegar hún hafi staðið sig jafnvel og hann segir, og með hliðsjón af því að hún hafi meiri reynslu en til dæmis Árni Magnússon félagsmálaráðherra, segir Halldór mörg sjónarmið koma til álita í þessu sambandi. Hann hljóti að gera tillögu um hvernig flokkurinn skipi til verka með það í huga að hann geti skilað sem bestu starfi, og þetta sé hans tillaga á þessum tímapunkti.  Siv sagði eftir fundinn að hún hefði gjarnan viljað halda áfram í ríkisstjórninni en niðurstaðan hafi verið önnur að þessu sinni. Hún segir niðurstöðuna vera þvert á samþykktir helstu stofnana Framsóknarflokksins, til að mynda flokksþingsins, Framsóknarkvenna og ungliðahreyfingarinnar, og hún hafi ekki verið sú sem Framsóknarmenn í kjördæmi Sivjar, Suðvesturkjördæmi, hafi viljað sjá. Jafnframt sé niðurstaðan þvert á allar þær almennu hefðir sem miðað sé við þegar ráðherrar eru valdir og því telur Siv alveg ljóst að í framhaldinu þurfi að efla alla jafnréttisumræðu í landinu. Hún segir nýjan dag koma eftir þennan dag og hún sé ekki að hætta í stjórnmálum. Aðspurð hvort hún telji sig eiga afturkvæmt í ríkisstjórn segist Siv trúa að hún eigi möguleika á því.  Fæsti virðast eiga von á því að þessi deila undanfarna daga og vikur muni skaða Framsóknarflokkinn til frambúðar, enda vita allir sem er að það þýðir ekkert að vera sérstaklega óþægur ef maður vill verða ráðherra síðar meir. Enginn þingmaður Framsóknarflokksins vildi segja hvort hann hafi greitt atkvæði með tillögu Halldórs Ásgrímssonar, nema Jón Kristjánsson heilbrigðisráðherra. Hann segist hafa gert það því hann hafi stutt hana.   Ekki eru allir viðhlæjendur vinir þannig að ekki er viturlegt að draga neinar ályktanir af þeirri gleðistund átta Framsóknarþingmanna sem þeir áttu á kaffihúsi eftir fundinn í dag. Þar voru allir þingmenn flokksins utan Jónínu Bjartmarz, Kristins H. Gunnarssonar, Sivjar Friðleifsdóttur og formannsins.