Yfirlýsing sögð rýr

Engar ráðleggingar um bindandi aðgerðir til að stemma stigu við gróðurhúsaáhrifum er að finna í svokallaðri Reykjavíkur-yfirlýsingu ráðherra ríkjanna átta sem eiga aðild að Norðurheimskautsráðinu, en fundi þeirra lauk í Reykjavík í gær. Fundurinn ræddi skýrslu vísindamanna Norðurskautsráðsins sem vakti heimsathygli þegar hún var birt fyrr í mánuðnum. Þar var því haldið fram að Norðurheimskautið hlýnaði helmingi meira en aðrir staðir á jörðinni og bráðnun heimskautsins og jökla hefði áhrif á allt líf jarðarbúa. Sigríður Anna Þórðardóttir, umhverfisráðherra stýrði blaðamannafundi í gær fyrir hönd Íslands sem situr í forsæti ráðsins. Hún sagði að yfirlýsingin sem lýsti þeirri samstöðu sem hægt hefði verið að ná: "Það stóð aldrei til að við tækjum ákvarðanir sem væru bindandi fyrir einstök aðildarlönd ráðsins." Erkki Toumioja, utanríkisráðherra Finnlands tók í svipaðan streng : "Þetta var besta yfirlýsing sem hægt var að ætlast til hérna." Bent er á Bandaríkjamenn sem hina svörtu sauði eins og svo oft áður í alþjóðlegum umhverfismálum frá því George W. Bush varð forseti í ársbyrjun 2001. Bush stjórnin hefur ekki hafa fullgilt Kyoto-bókunina um minnkun losunar koltvíserings sem talinn er valda hlýnun jarðar. Dr. Paula Dobriansky, aðstoðar-utanríkisrsáðherra Bandaríkjanna vildi gera sem minnst úr ágreiningi sem er uppi á milli Evrópuríkja og Bandaríkjanna. "Við höfum sameiginleg markmið en nálgumst þau á mismunandi hátt." Umhverfisverndarsamtök hafa hins vegar brugðist ókvæða við aðgerðaleysi ráðherra þrátt fyrir hina svörtu skýrslu: "Norðurheimskautslöndin hafa misst af tækifæri til að taka forystu í viðbrögðum sinni við Loftslagsskýrslunni um Norðurskautið", sagði WWF í yfirlýsingu. Náttúruverndarsamtök Íslands taka í svipaðan streng: " Ríki Norðurskautsráðsins undir formennsku Íslands af tækifæri til að veita forystu í aðgerðum til að bregðast við þeirri ógn sem steðjar að lífríki norðursins."