Áherslan á öryggismál

Aukið öryggi friðargæslufólks er einn af þeim hlutum sem Hjálmar W. Hannesson, sendiherra og fastafulltrúi Íslands hjá Sameinuðu þjóðunum í New York í Bandaríkjunum lagði áherslu á þegar hann ávarpaði fjórðu nefnd allsherjarþingsins við umræðu um stefnu í friðargæslu síðasta miðvikudag. Hjálmar benti á að sífellt aukin þörf fyrir friðargæslu væri fastur liður í starfi og viðfangsefnum Sameinuðu þjóðanna, sem ein og sér gætu ekki annast öll þau verkefni, en yrðu í vaxandi mæli að leita samstarfs við önnur samtök, sem réðu yfir mannafla og búnaði. Þá skýrði hann frá uppbyggingu Íslensku friðargæslunnar og verkefnum Íslendinga á sviði friðargæslu og neyðaraðstoðar síðustu ár.