Gráir fyrir járnum

Íslensku friðargæsluliðarnir í Kabúl eru gráir fyrir járnum þegar þeir fara út af herbækisstöðinni við flugvöllinn. Þá eru þeir með riffla og skammbyssur og klæddir skotheldum vestum. Líðan friðargæsluliðana sem særðust í sjálfsmorðsárás í gær er sögð góð. Auk sjálfsvígsárásarmannsins fórust tveir í hryðjuverkaárásinni í gær: ung bandarísk kona sem starfaði sem túlkur og ellefu ára gömul afgönsk stúlka. Íslensku friðargæsluliðarnir voru með hjálma og í skotheldum vestum sem kunna að hafa bjargað lífi þeirra. Að auki voru bílar þeirra brynvarðir, og þó var annar þeirra óökufær eftir árásina. Samkvæmt fréttaskeytum frá alþjóðlegum fréttastofum voru það þrír íslenskir hermenn sem særðust í árásinni, þar af einn alvarlega. Talsmenn utanríkisráðuneytisins segja ekkert til í þessu og að allir séu friðargæsluliðarnir við góða heilsu á þýsku hersjúkrahúsi. Friðargæsluliðarnir tilheyra hersveitum NATO í Afganistan og eru búnir vopnum þegar þeir fara út af herstöðinni við flugvöllinn í Kabúl. Samkvæmt reglum NATO eru þeir með riffla og skammbyssur, auk þess að vera klæddir skotheldum vestum og með hjálma. Því er spurning hversu auðvelt sé að greina á milli þessarra íslensku friðargæsluliða og annarra hermanna í landinu. Hallgrímur Sigurðsson, ofursti í NATO-liðinu og yfirmaður flugvallarins í Kabúl, er yfirmaður einnar af u.þ.b. tíu herbækistöðvum í borginni. Auk íslensku friðargæsluliðanna sextán eru þar mörg hundruð hermenn frá öðrum ríkjum en um 1600 manns búa á stöðinni sem er við flugvöllinn.  Hallgrímur er að auki yfirmaður alls starfsliðs flugvallarins, frá hlaðmönnum og flugumferðarstjórum til vopnaðra öryggissveita. Þrátt fyrir ítrekaðar tilraunir tókst fréttastofunni ekki að fá viðtal við Hallgrím í dag.