Ráðuneytið neitar fréttum Reuters

Einn íslensku friðargæsluliðanna sem lentu í sjálfsmorðsárás í Kabúl í Afganistan í gær er þungt haldinn á sjúkrahúsi, samkvæmt því sem talsmaður friðargæsluliðs NATO í landinu segir. Hjá utanríkisráðuneytinu er fréttum Reuters vísað á bug. Samkvæmt frétt Reuters voru það íslenskir hermenn sem urðu fyrir árásinni í miðborg Kabúl í gær en í fréttum Stöðvar 2 í gærkvöldi kom fram að Íslendingarnir hefðu verið með hjálma og í skotheldum vestum. Bílar þeirra voru brynvarðir en sprengingarnar sem sjálfvígsmaðurinn olli voru það öflugar að annar bílanna var óökufær. Upphaflega var hermt að enginn hefði slasast alvarlega eða látist. Nú er hins vegar ljóst að auk sjálfsvígsmannsins fórust tveir í árásinni. Bandarísk kona og ung, afgönsk stúlka létust af sárum sínum í gær og nótt. Að auki segir talsmaður hersveita NATO í Kabúl að einn Íslendinganna sé alvarlega slasaður. Helen Ólafsdóttir, sem er í Afganistan, segir götuna sem árásin var gerð í vera mikla túristagötu. Það skýri líklega að einhverju leyti af hverju árásin var gerð þar. Hún segir hjálparstarfsmönnum í landinu, en hún býr með nokkrum þeirra, ekki hafa brugðið mikið við tíðindin því þeir hafi búist við lengi að eitthvað þessu líkt gerðist. Menn eru frekar hissa á því hvað árásin sé „lítil“ - einn maður með nokkrar handsprengjur. Helen segir að svo virðist sem talibanar nái ekki að komast inn í Kabúl og þakkar fólk það hörðu eftirliti lögreglu og hermanna.  Spurð hversu mikil hættan sé í landinu segir Helen að miðað við Írak sé ástandið mjög gott. Árásin í gær minni fólk hins vegar á að hættur leynist alls staðar í Afganistan eins og ástandið er núna. Hjá íslenska utanríkisráðuneytinu er fréttum Reuters vísað á bug. Stefán Gunnarsson, sá sem slasaðist mest, ræddi við yfirmenn friðargæslunnar hér á landi fyrir stundu og var þá að snæða pítsu, vel haldinn, að sögn ráðuneytisins. Reuters vitnaði beint í talsmann hersveita NATO í Kabúl sem sagði íslenska hermanninn alvarlega slasaðan. Hægt er að hlusta á viðtal við Helen Ólafsdóttur frá Afganistan úr hádegisfréttum Bylgjunnar með því að smella á hlekkinn hér að neðan.