Vill ljósleiðaravæða bæinn

Níu hafa þegar sótt gögn til Seltjarnarnesbæjar eftir að bærinn auglýsti eftir samstarfsaðilum til að ljósleiðaravæða bæinn. Jónmundur Guðmarsson, bæjarstjóri á Seltjarnarnesi, segir að 22. október verði innsendar hugmyndir opnaðar og skoðaðar. Miðað er við að ljósleiðarakerfið verði komið upp í bænum fyrir lok næsta árs, en koma á leiðara upp að hverju húsi í bænum. "Það er ljóst að talsverður áhugi er á málinu enda myndi Seltjarnarnesbær þá verða brautryðjandi í leiðaravæðingu bæjarfélaga," segir Jónmundur og bætir við að sveitarfélög vítt og breitt um Norðurlönd hafi fetað svipaða slóð. "Menn eru ekki að fara að bjóða þjónustuna heldur er verið að leggja vegakerfið þannig að mismunandi fyrirtæki séu ekki öll að því. Þannig verður til einn leiðari sem bæjarbúar geta keypt í gegnum þjónustu af hverjum sem er." Jónmundur segir endanlega útfærslu verkefnisins ekki liggja fyrir og alls ekki víst að bærinn komi til með að eiga ljósleiðarann sem lagður verður. "Við erum í rauninni að bjóða bæinn undir svona verkefni."