Bara heræfing?

Rússnesku herskipin sem hafa haldið sig við norðausturstrendur Íslands síðustu dagana eru aðeins á hefðbundinni heræfingu. Þetta segir Sergej S. Gúsjín, talsmaður rússneska sendiráðsins, sem fullyrðir einnig að engir kafbátar hafi tekið þátt í æfingunni og ekkert slys hafi orðið. Ferðir rússneska norðurflotans, sjö rússneskra herskipi norðaustur af Íslandi, hafa vakið mikla athygli enda flestir sammála um að þetta sé afar óvenjuleg aðgerð hjá Rússunum. Talsmaður rússneska sendiráðsins á Íslandi segir að ekkert óvenjulegt sé á seyði; þetta sé aðeins annar áfanginn í mikilli mánaðarlangri heræfingu rússneska norðurflotans sem hófst með sameiginlegri heræfingu Rússa og Bandaríkjamanna 23. september. Sergej Gúsjín segir ferðina til Íslands síðasta áfanga í leiðangri flotans á æfingarferð, þar sem bæði flugtök og lendingar voru æfð. Hann segist ekki hafa upplýsingar um ástæðu þess að þessi staður hafi orðið fyrir valinu. Íslensk yfirvöld hafa í raun ekkert um þessa æfingu að segja enda er hún á alþjóðlegu hafsvæði og Rússum ber engin skylda til að tilkynna um ferðir sínar. Grannt er þó fylgst með ferðum Rússanna. Illugi Gunnarsson, aðstoðarmaður utanríkisráðherra segir ekkert við þetta að athuga, en velk sé fylgst með og gætur sé hafðar á að ekkert óeðlilegt fari fram. Margir telja mögulegt að slys hafi orðið á staðnum, enda ekki langt síðan Rússar leyndu því þegar kafbáturinn Kusk fórst undan Noregsströndum. Sergey segist engar heimildir hafa fyrir því að svo sé og það sé aðeins í viðvörunarskyni að Rússar hafi sent Íslendingum beiðni um að koma ekki nálægt skipunum. Hann segir að stjórnvöld í Moskvu myndu láta sendiráð Rússlands á Íslandi vita ef að slys hefði orðið. Þó gæti liðið nokkur tími uns það yrði.