Keppt í samlokugerð

Samloka er ekki bara tvær brauðsneiðar með áleggi sem búið er að skella saman. Það kom í ljós í hörkuspennandi keppni í samlokugerð sem fram fór í dag, þeirri fyrstu sinnar tegundar hér á landi.  Keppnin var ekki opin öllum þeim fjölmörgu sem telja sig leikna í að útbúa ost og skinkusamloku heima í eldhúsi, heldur var um að ræða átta meistara og konditora sem sýndu hugmyndir sínar um hina fullkomnu samloku. Auk þess að vera girnileg og áferðarfalleg mátti hún ekki kosta of mikið, vera auðveld í samsetningu og ná að kitla bragðlauka dómara keppninnar. Til mikils var að vinna, því sigurvegarinn fær að fara á heimsmeistaramót í samlokugerð í Frakklandi á næsta ári á vegum fyrirtækisins Delifrance og eiga notalega daga á frönsku rívíerunni. Þá verður samlokan kynnt á um 500 kaffihúsum um allan heim. Keppendur fengu 20 mínútur til að undirbúa sig í eldhúsinu. Þegar fréttastofu bar að garði var sigurreifur maður að störfum, Kristinn Guðmundsson frá Hótel Borg, sannfærður um að vinna keppnina hér heima og ytra. Hann sagði að grunnurinn væri kjúklingurinn í samlokunni og að nota ímyndunaraflið. Svo þyrfti hráefnið og brauðið að vera gott. Og það var einmitt kjúklingasamloka Kristins með tómatmauki, piparrótardressingu og salati sem rann svo ljúflega niður í dómnefndina að hann hreppti vinningssætið. Hún var einfaldlega rosalega góð á bragðið að sögn nefndarmanna.