Ráðherra sammála Hafró

Árni M. Mathiesen, sjávarútvegsráðherra, tekur að mestu undir allar tillögur Hafrannsóknarstofnunar varðandi leyfilegan heildarafla á næsta fiskveiðiári en ráðherra skrifaði undir reglugerð þar að lútandi í gær. Þannig verður heildarafli í þorski 205 þúsund tonn eins og Hafró lagði til þrátt fyrir gagnrýni margra aðila innan sjávarútvegsins. Kvóti í ýsu verður 90 þúsund tonn, ufsa 70 þúsund og aflamark í grálúðu verður 15 þúsund tonn en það er einnig í samræmi við tillögur. Margir útgerðar- og sjómenn sem Fréttablaðið hefur rætt við segja dæmalaust að ætla að draga út veiðum á fiski sem eins og sakir standa hefur ekki nóg fæði í sjónum. Loðnan hefur enn ekki fundist þrátt fyrir mikla leit og vill Hafró ekki ákveða neitt með veiðar á henni fyrr en línur skýrast hvað veldur því að hún finnst ekki lengur á Íslandsslóð.Sjávarútvegsráðherra hefur sagt að ekkert breytist varðandi veiðar á þorskinum þótt loðnan finnist í magni þegar fram líður. Loðnuveiðin á yfirstandandi fiskveiðiári er langt undir útgefnum kvóta sem var 875 þúsund tonn. Eina breytingarnar frá tillögum Hafrannsóknarstofnunar sem ráðherra gerir er að leyfilegur heildarafli á skarkola verður þúsund tonnum meiri og heildarafli rækju á djúpslóð verður 20 þúsund tonn en það breytist hugsanlega í haust enda liggja endanlegar tillögur Hafró um framhald rækjuveiða ekki fyrir fyrr en þá. Ráðherra hefur ennfremur undirritað reglugerð um hækkun á leyfilegum heildarafla í kolmunna á þessu ári en hann hækkar um 220 þúsund tonn. Sú ákvörðun byggir á mati á því hversu skip Evrópusambandsríkja geta veitt til viðbótar af kvótaaukningu sem ESB ákvað en ekki hefur tekist að semja um takmarkanir á kolmunnaveiðum og ákveða veiðiþjóðir slíkt einhliða. albert@frettabladid.is