Skilar ríkissjóði 340 milljónum

Alþingi samþykkti í kvöld frumvarp sem felur í sér að áfengisgjald á sterku víni og tóbaki hækkar um 7%. Áfengisgjald af léttu víni og bjór verður óbreytt. Ætla má að smásöluverð á sterku víni hækki um 5,6% og verð á tóbaki um 3,7%. Hækkunin skilar ríkissjóði 340 milljóna króna tekjuauka. Áætluð áhrif á vísitölu neysluverðs eru talin verða um 0,08%. Frumvarpið fékk skjóta afgreiðslu gegnum þingið. Fjármálaráðherra lagði það fram á Alþingi um sexleytið og lögfestingu var lokið fjórum klukkustundum síðar. Frumavrpið var samþykkt með 35 samhljóða atkvæðum. Níu þingmenn Samfylkingarinnar og Frjálslynda flokksins sátu hjá og 19 þingmenn voru fjarstaddir.