Beittu ofbeldi, brutu og brömluðu

Þrír menn réðust inn á ritstjórn DV í dag og gengu í skrokk á fréttastjóra blaðsins. Þeir unnu einnig skemmdarverk á skrifstofunni áður en þeir hurfu á braut. Lögregla telur sig vita hvaða menn voru að verki og leitar þeirra. Laust eftir klukkan eitt í dag ruddust mennirnir inn á ritstjórn DV. Reynir Traustason, fréttastjóri segir að þeir hafi spurt eftir Mikaeli Torfasyni, ritstjóra blaðsins. Mikael var ekki við og segist Reynir hafa sagt mönnunum að þeir yrðu að gera boð á undan sér og síðan beðið þá vinsamlegast að hverfa á brott. Þá hafi þeir ráðist að Reyni og einn þeirra gripið hann þéttu kverkataki í tvígang. Á leiðinni út ruddu þeir möppum og öðru lauslegu af skrifborðum sem urðu á vegi þeirra á gólfið. Reynir segist hafa elt mennina út en þeir þá ógnað honum og hrækt á hann. Þeir hurfu síðan akandi á brott. Reynir er með áverka á hálsi og fór hann á slysadeild í dag. Hann segist ætla að leggja fram kæru á hendur mönnunum á morgun. Ómar Smári Ármannsson, aðstoðaryfirlögregluþjónn, sagði í samtali við fréttastofu síðdegis að lögregla teldi sig vita hvaða menn hefðu verið þarna á ferðinni og sagði þeirra leitað. Ekki er vitað hvaða erindi mennirnir áttu við ritstjórann, en á DV telja menn víst að þetta tengist umfjöllun blaðsins um handrukkara og ofbeldisverk þeirra. Eitt vitni að atburðinum í dag segir menninna hafa verið í jökkum merktum vélhjólaklúbbnum Fáfni, sem hafa verið í vinfengi við Hells Angels í Danmörku. Hvorki ritstjóri né fréttastjóri DV vildu veita fréttastofu viðtal í dag, en í yfirlýsingu ritstjóra blaðsins segir að lögregla virðist lítið geta gert varðandi þessa ofbeldisseggi. Mikael Torfason segir að lögregla vakti heimili hans eftir að honum var hótað fyrir nokkrum dögum. Öðrum blaðamönnum hefur einnig verið hótað og fréttastofa hefur heimildir fyrir því að í einu tilfelli hafi menn ruðst inn á heimili afa og ömmu eins blaðamanns og hringt úr síma þeirra í viðkomandi blaðamann til að sýna honum hvers þeir væru megnugir. Í yfirlýsingu ritstjóra DV segir að þessir menn hiki ekki við að berja borgarana með stálröri, taka fjölskyldur manna í gíslingu, ráðast að ástvinum og hóta jafnvel að gera smábörnum mein. DV segist ætla að halda áfram umfjöllun sinni um þetta þjóðfélagsmein.