Fleiri fréttir

Brún landans þyngist enn

Væntingavísitala Gallup lækkaði þriðja mánuðinn í röð í þessum mánuði. Vísitalan stendur nú í 55,5 stigum; lækkaði um 2,3 stig frá því í mars.

Ríkið stýri nýtingu og kosti rannsóknir

Ef tryggja á sjálfbæra nýtingu jarðvarma í landinu verður ríkið að tryggja að auðlindastýring sé markviss og skynsamleg og kosta nægilegar rannsóknir svo það sé mögulegt, að því er fram kemur í nýrri skýrslu um sjálfbæra nýtingu jarðvarma.

Besta afkoma í þrettán ár

Bandaríski bílaframleiðandinn Ford Motor Company hagnaðist um 2,55 milljarða Bandaríkjadala, jafnvirði 287 milljarða íslenskra króna, á fyrsta fjórðungi ársins. Þetta er 22 prósenta aukning á milli ára og ein besta afkoma fyrirtækisins í þrettán ár.

Batahorfur ágætar á Íslandi

Ágætis útlit fyrir er fyrir bata í efnahagslífinu á Íslandi þrátt fyrir ótta um að niðurstöður Icesave kosninganna myndu hægja á bataferlinu, segir yfirmaður hjá Alþjóðagjaldeyrissjóðnum.

SAAB í miklum vandræðum

Bílaframleiðandinn SAAB er á barmi gjaldþrots og keppast stjórnendur nú við að selja eignir til þess að halda fyrirtækinu á floti. Framleiðsla hefur nær algjörlega stöðvast í aðalverksmiðju SAAB í Svíþjóð síðasta mánuðinn en um 2000 manns vinna í verksmiðjunni. Ástæða framleiðslustöðvunarinnar er sú að birgjar hafa ekki fengið greitt fyrir íhluti í bílana.

Laun hækkuðu um 0,3 prósent

Laun hækkuðu um 0,3% í mars síðastliðnum frá fyrri mánuð samkvæmt mánaðarlegri launavísitölu Hagstofu Íslands sem birt var síðastliðinn miðvikudag og greint er frá í morgunkorni Íslandsbanka.

Konum fjölgar í stjórnunarstöðum

Jafnréttisátak Marel, sem miðar að því að auka hlut kvenna í stjórnunar- og sérfræðistörfum, hefur þegar á fyrsta ársfjórðungi skilað sér í þremur nýráðningum. Marel undirritaði Jafnréttissáttmála Sameinuðu þjóðanna, í nóvember og hefur síðan unnið markvisst að því að auka hlut kvenna í fyrirtækinu. Í marsmánuði tóku til starfa hjá Marel þrjár konur í stöðum framkvæmdastjóra í Marel í Frakklandi, verkefnastjóri og sýningarstjóri á markaðssviði. Þessu til viðbótar var í apríl gengið frá ráðningu á fyrsta kvenkyns framleiðslustjóra fyrirtækisins á Íslandi. Hún hefur störf í júní. „Þetta er hagsmunamál fyrir okkur því að með því að tryggja jafnrétti hjá Marel náum við frekar að laða að bestu starfskraftana hverju sinni. Stöðug nýsköpun er einn af hornsteinum okkar hjá Marel og við vitum að bestu hugmyndirnar spretta uppúr teymisvinnu. En það er ekki nóg að þekkingin sé til staðar í hópnum. Ef það skortir á fjölbreytileika hópsins er líklegt að afraksturinn verði fyrirsjáanlegur," segir Theo Hoen, forstjóri Marel.

Toyota gæti dottið niður í þriðja sætið

Svo gæti farið að bílarisinn Toyota detti niður í þriðja sætið yfir stærstu bílaframleiðendur heimsins sökum hamfaranna í Japan. Toyota hefur síðustu ár verið stærsti framleiðandi heimsins en General Motors og Volkswagen gætu siglt fram úr þeim á þessu ári. Framleiðsla Toyota og annara japanskra framleiðenda hefur stórskaðast vegna jarðskjálftans þar í landi auk þess sem skemmdir á kjarnorkuverum landsins hafa orsakað orkuskort.

Verð á gulli og silfri í methæðum

Verð á gulli og silfri fór í methæðir í morgun. Ástæðan er sú að bandaríkjadalur er að lækka og ófriður í Mið-Austurlöndum og Norður-Afríku ógnar stöðugleika.

Árlegur hagnaður Nintendo hrynur um 66%

Árlegur hagnaður tölvuleikjarisans Nintendo hefur lækkað um 66% en er nú 77.6 milljarðar jena eða 106,5 milljarðar íslenskra króna samanborið við 314 milljarða króna hagnað fyrirtækisins á síðasta ári. Tapið má rekja til minnkandi sölu og sterkrar stöðu jensins.

Unnið alla helgina við að bjarga All Saints

Æðstu stjórnendur All Saints tískuvöruverslunarinnar segja að þeir hafi fundið nýja fjárfesta inn í félagið. Nýju fjárfestarnir munu koma í veg fyrir að félagið fari í greiðslustöðvun. Þetta er fullyrt á vef Daily Mail.

Verðbólgan étur upp launahækkanirnar

Kaupmáttur hefur dregist saman tvo mánuði í röð, en ef engar launahækkanir koma til munu verðlagshækkanir áfram rýra kjör almennings. Forseti ASÍ segir ekki hægt að draga launahækkanir lengur.

Jaguar ætlar að fjölga um 1000 störf

Jaguar verksmiðjurnar, sem er einn af stærstu bílaframleiðendum í Bretlandi, munu hugsanlega opna nýja verksmiðju á Bretlandi sem gætu skapað meira en 1000 störf. Fréttavefur Daily Telegraph segir að þetta gæti orðið vatn á myllu ríkisstjórnar Bretlands sem glímir við samdrátt í efnahagslífinu. Eftirspurn eftir Jagúar bifreiðum hefur aukist í Asíu. Auk Jagúar framleiða verksmiðjurnar jafnframt Land Rover bifreiðar. Líklegast er að nýja verksmiðjan verði í Bretlandi en einnig kemur til greina að hún verði á Indlandi.

Icesave úrskurður á miðvikudag

Héraðsdómur Reykjavíkur mun á næsta miðvikudag kveða upp úrskurð í máli fjölmargra kröfuhafa gamla Landsbankans um Icesave innistæðurnar. Ágreiningurinn lýtur að því hvort eðlilegt hafi verið að verki staðið hjá skilanefnd og slitastjórn Landsbankans þegar Icesave innistæðurnar voru flokkaðar sem forgangskröfur í þrotabú gamla Landsbankans.

Geta mögulega krafist skaðabóta vegna ólöglegra samninga

Eigendur fyrirtækja sem hafa farið í þrot vegna ólögmætra fjármögnunar-eigusamninga geta mögulega farið í skaðabótamál við lánafyrirtækin. Þetta segir lögmaður þrotabús Kraftvélaleigunnar sem varð gjaldþrota í fyrra.

Kaupmáttur lækkaði í mars

Kaupmáttur launa lækkaði í mars um 0,6%, samkvæmt tölum Alþýðusambands Íslands. Ástæðan er sú að undanfarið hefur hækkun matar- og bensínverðs kynt undir verðbólgu og þar með minnkað kaupmáttinn. Á ársgrundvelli hefur kaupmátturinn hins vegar aukist um 2,1%.

ÍAV náði 9 milljarða samningi í Noregi

Íslenskir aðalverktakar og Marti munu í næstu viku skrifa undir samning um gerð járnbrautaganga við Holmestrand í Noregi. Holmestrand er við Oslóarfjörðinn vestanverðan um 80 kílómetrum suður af Osló. Þetta er fyrsta verkefni sem Íslenskir aðalverktakar vinna í Noregi, að sögn Karls Þráinssonar aðstoðarforstjóra fyrirtækisins.

Eðlileg framleiðsla í árslok

Verulega hefur dregið úr framleiðslugetu japanska Toyota bílaframleiðandans vegna jarðskjálftanna og flóðbylgjunnar í Japan. Forsvarsmenn fyrirtækisins telja að framleiðslan verði komin í eðlilegt horf í nóvember eða desember. Vegna náttúruhörmunganna í Japan hafa framleiðendur ekki geta nálgast íhluti í bílana og það hefur valdið töf á framleiðslu.

Skattar draga úr eftirspurn

Það gengur ekki lengur að horfa á skattahækkanir sem úrlausn í opinberum fjármálum segir formaður félags atvinnurekenda. Yfir áttatíu prósent fyrirtækja segja auknar skattahækkanir hafa neikvæð áhrif á eftirspurn. Jóhanna Margrét Gísladóttir. Í könnun sem félag atvinnurekenda gerði meðal félagsmanna sinna fyrr á árinu kemur fram að 83 prósent félagsmanna segja auknar skattaálögur hafa neikvæð áhrif á eftirspurn á þeim markaði sem fyrirtæki þeirra starfar á. Þá hafa yfir fimmtíu prósent fyrirtækja gripið til hagræðingaraðgerða beinlínis vegna aukinna skattaálagna. Almar Guðmundsson, framkvæmdastjóri Félags atvinnurekenda segir könnunina vera athyglisverð skilaboð til stjórnvalda í því árferði sem við búum við núna. „Ef að menn ná ekki hér upp eftirspurn sem smitar þá inn í það að kaupgeta almennings fer að aukast og kaupgeta fyrirtækja og þar af leiðandi skapast störf, þá þýðir það að vítahringurinn heldur áfram og við munum horfa upp á atvinnuleysi svipað og verið hefur samaborið við það að geta komið hjólum atvinnulífsins af stað" segir Almar Hann segir hagræðingar hjá hinu opinbera hafa gengið vel hingað til og hvetur stjórnvöld til að halda áfram á þeirri leið. Efnahagsumhverfi íslenskra fyrirtækja sé erfitt um þessar mundir og framtíðarsýnin lítil. „Sem betur fer hafa mörg fyrirtæki verið endurskipulögð og eru svona smátt og smátt að komast á ról, en það þarf auðvitað meiri vöxt og hann gerist auðvitað í kringum það að umhverfið sé hóflegt varðandi skattastig og einnig þannig sköpum við kaupmátt og getum farið að skapa störfin, sem er það sem að flestir vilja" Hann segir skilaboð félagsmanna hans vera skýr. „Það gengur ekki lengur að horfa á skattahækkanir sem einhverja úrlausn opinberum fjármálum" segir Almar að lokum.

Koma hefði mátt í veg fyrir gjaldþrot fjölmargra fyrirtækja

Lánafyrirtæki eru farin að viðurkenna ólögmæti fleiri gengistryggðra lánasamninga en Hæstiréttur hefur úrskurðað um. Koma hefði mátt í veg fyrir gjaldþrot fjölmargra fyrirtækja ef lánafyrirtækin hefðu tekið mið af eldri dómum Hæstaréttar. Í vikunni úrskurðaði Héraðsdómur Reykjavíkur að gengistryggðir fjármögnunarleigusamningar væru ólöglegir. Slíkir samningar voru gerðir fyrir hrun til að fjármagna kaup fyrirtækja á atvinnutækjum. Lánafyrirtækin hafa jafnan stuðst við fimm lánasamningsform. Kaupleigusamninga, bílasamninga, fjármögnunarleigusamninga, einkaleigusamninga og rekstrarleigusamninga. Kaupleigu og bílasamningar voru dæmdir ólögmætir í fyrra. "Í kjölfar þeirra dóma brugðust fyrirtækin þannig við að þau töldu hin þrjú formin, sem eru fjármögnunarleiga, einkaleiga og rekstrarleiga vera lögmæt og annars eðlis," segir Árni Helgason héraðsdómslögmaður og lögmaður lántakanda hjá SP-fjármögnun. Nú hafa fjármögnunarleigusamningar verið dæmdir ólögmætir en dómstólar hafa ekki tekið afstöðu til einkaleigu og rekstrarleigusamninga. Þó eru dæmi um að lánafyrirtækin telji önnur gengistryggð lánaform ólögmæt þótt dómar hafi ekki fallið í þeim efnum. Skjólstæðingur Árna Helgasonar lögmanns var með einkaleigusamning hjá Sp fjármögnun. "Sp-fjármögnun féllst á það að einkaleigusamningar væru þess eðlis að það bæri að endurreikna þá eins og aðra samninga sem hafa verið dæmdi ólögmætir. Þetta var ákveðin breyting frá því sem þeir höfðu sagt áður. Það munaði töluverðu fyrir fólk sem er búið að greiða af þessu í nokkur ár," segir Árni og bætir við að treglega hafi gengið að fá bankana til að viðurkenna og endurreikna þessi lán. Hann segir að hefðu lánafyrirtækin tekið samstundis mið af dómum Hæstaréttar frá því í fyrra hefði hugsanlega verið hægt að koma í veg fyrir fjölmörg gjaldþrot hjá einstaklingum og fyrirtækjum. "Það er auðvitað orðið mál sem þarf að skoða líka, hvernig á að fara með fyrirtæki sem hafa verið í fjárhagslegri spennitreyju og óvissu hjá bönkunum í tvö og hálft ár, þegar í ljós kemur að þessi lán voru allan tímann ólögmæt," segir Árni.

Minni sala á mjólkurafurðum

Sala á mjólkurvörum í mars var heldur minni í ár en á sama tíma í fyrra. Ekki var aukning á sölu í neinum vöruflokki í mánuðinum. Þetta kemur fram í yfirliti frá Samtökum afurðastöðva í mjólkuriðnaði. Sölusamdráttur á próteingrunni var 9,11% en 7,69% á fitugrunni. Framleiðslan í ár var sömuleiðis töluvert minni en í fyrra og munar þar um 2.51% milli ára. Alls hafa kúabú landsins nú framleitt 31,0 milljónir lítra mjólkur á fyrstu þremur mánuðum ársins, en í fyrra var framleiðslan á sama tíma 31,8 milljónir lítra. Þetta kemur fram á vef Landssambands kúabænda.

Beðið eftir Standard & Poor's

Matsfyrirtækið Moody's staðfesti í gærkvöldi lánshæfiseinkunnir ríkissjóðs. Horfur fyrir lánshæfismatið eru áfram neikvæðar.

Moody´s með óbreytt lánshæfismat

Matsfyrirtækið Moody‘s staðfesti í dag lánshæfiseinkunnir ríkissjóðs. Lánshæfiseinkunn langtímaskuldbindinga ríkissjóðs í innlendri og erlendri mynt er Baa3 og lánshæfiseinkunn skammtímaskuldbindinga ríkissjóðs í innlendri og erlendri eru P-3. Horfur eru áfram neikvæðar.

Tap á rekstri Húsasmiðjunnar en batnandi afkoma

Nokkur viðsnúningur varð í rekstri Húsasmiðjunnar á árinu 2010 en bókfært tap félagsins var 144 milljónir króna í stað 815 milljóna króna taps árið á undan að því er fram kemur í tilkynningu frá félaginu. „Rekstrarhagnaður fyrir afskriftir og fjármagnsliði nam 333,5 milljónum króna. Heildareignir Húsasmiðjunnar í árslok 2010 námu 5,4 milljörðum króna og eigið fé var ríflega 1,4 milljarður króna,“ segir ennfremur.

Gullverð í hæstu hæðum

Gullverð er nú í hæstu hæðum og fór únsan í rétt rúma 1500 dollara á mörkuðum í Asíu, eða tæpar 170 þúsund krónur og hefur aldrei verið dýrara. Áhyggjur manna af því að efnahagskreppan í heiminum dragist á langinn hefur gert gull og aðra góðmálma að fýsilegum fjárfestingarkosti.

Dómurinn ógnar ekki fjármálastöðugleika

Niðurstaða Héraðsdóms Reykjavikur um fjármögnunarleigusamningana hefur ekki neikvæð áhrif á fjármálastöðugleika, segir Árni Páll Árnason, efnahags- og viðskiptaráðherra, í samtali við Vísi.

Segir Sigurjón hafa lagst gegn bankasameiningum

Sigurjón Þ. Árnason, fyrrverandi bankastjóri Landsbankans, lagðist gegn sameiningu bankans við tvo banka. Þetta kemur fram í færslu á vef Björgólfs Thors Björgólfssonar. Um var að ræða annars vegar sænska bankann Carnegie og hins vegar Straum. Björgólfur bendir á þetta með vísan til þess að bankastjórar Landsbankans hafi tekið ákvarðanir með hagsmuni Landsbankans í huga en ekki til þess að þóknast hluthöfum bankans.

Atvinnuleiðin strandar á ríkisstjórninni

Nú hafa aðilar vinnumarkaðarins verið að hugsa sinn gang varðandi atvinnuleiðina, þriggja ára kjarasamning sem byggir á auknum fjárfestingum til þess að koma Íslandi út úr kreppunni. Þegar horfið var frá verki sl. föstudagskvöld var ljóst að hvorki var unnt að ná samstöðu um atvinnuleiðina né samkomulagi til skamms tíma. Atvinnuleiðin strandar á ríkisstjórninni segir Vilhjálmur Egilsson, framkvæmdastjóri SA, m.a. í leiðara nýs fréttabréfs SA sem kemur út í dag.

Ráðleggur fólki að hætta að borga

Einar Hugi Bjarnason héraðsdómslögmaður ráðleggur þeim aðilum sem gerðu fjármögnunarleigusamninga við fjármálastofnanirnar að hætta að greiða af þeim. Héraðsdómur Reykjavíkur kvað upp úrskurð í gær, í máli Íslandsbanka gegn Kraftvélaleigunni, um að slíkir samningar væru óheimilir samkvæmt vaxtalögum. Einar Hugi Bjarnason hefur rekið sambærilegt mál fyrir Smákrana ehf. gegn Lýsingu.

Seðlabankinn dregur töluvert út hagvaxtarspá sinni

Seðlabankinn hefur dregið töluvert úr spá sinni um hagvöxt á árinu. Nú telur bankinn að hagvöxturinn verði um 2,3% en í spá sinni í febrúar s.l. taldi bankinn að hann yrði 2,8% á árinu.

Atvinnuleysi mest í yngsta aldurshópnum

Atvinnulausum fjölgaði um 200 á fyrsta ársfjórðungi þessa árs miðað við fyrsta ársfjórðung í fyrra. Að meðaltali voru 13.700 manns án vinnu og í atvinnuleit eða 7,8% vinnuaflsins á fyrsta ársfjórðuni þessa árs. Atvinnuleysi mældist 9,9% hjá körlum og 5,5% hjá konum.

Kaupmáttur lækkar milli mánaða

Vísitala kaupmáttar launa í mars síðastliðnum er 106,4 stig og lækkaði um 0,6% frá fyrri mánuði. Síðustu tólf mánuði hefur vísitala kaupmáttar launa hækkað um 2,1%.

Peningastefnunefnd heldur stýrivöxtum óbreyttum

Peningastefnunefnd Seðlabanka Íslands hefur ákveðið að halda vöxtum bankans óbreyttum. Vextir á viðskiptareikningum innlánsstofnana verða áfram 3,25%, hámarksvextir á 28 daga innstæðubréfum 4,0%, vextir á lánum gegn veði til sjö daga 4,25% og daglánavextir 5,25%.

Sjá næstu 50 fréttir

Mest lesið