Flóran ein flottasta bók Evrópu

Bók Eggert Péturssonar, Flóra Íslands, fékk silfurverðlaun í keppni evrópskra hönnuða og auglýsingastofa sem fram fór í Barcelona í júní síðastliðnum. Það voru þær Snæfríður Þorsteins og Hildigunnur Gunnarsdóttir sem hlutu þessi verðlaun en þær höfðu áður hlotið verðlaun FÍT í flokki grafískrar hönnunar fyrir prentmiðla fyrir þessa bók. „Þetta er alveg glæsilegt og árangurinn þýðir að við getum sent bókina í enn stærri keppni,“ segir Hörður Lárusson, formaður FÍT.

Spánn breytti lífi Paltrow

Leikkonan Gwyneth Paltrow segir að Spánn hafi breytt lífi hennar og landið hafi orðið hennar annað heimili eftir að hún bjó þar á unglingsárum sínum. Núna heimsækir hún landið að minnsta kosti einu sinni á ári og leggur áherslu á að börnin hennar Apple og Moses, sem hún á með popparanum Chris Martin, læri tungumálið í leiðinni.

Unnur Birna og Herdís leika á móti Ladda

Eins og fram kom í Fréttablaðinu í gær eru tökur hafnar á kvikmyndinni Jóhannes sem skartar þeim Stefáni Karli Stefánssyni og Ladda í aðalhlutverkum. Leikstjóri er Þorsteinn Gunnar Bjarnason og var tökuliðið statt í Breiðholtinu í gær. Um fjölskyldumynd er að ræða en hún segir frá degi í lífi manns þar sem allt fer öðruvísi en ætlað var. Þetta er fyrsta kvikmynd Þorsteins í fullri lengd og því kom mörgum á óvart að honum skyldi takast að fá bæði Ladda og Stefán Karl í mynd til sín.

EP-plata og tónleikaplata

Hljómsveitin R.E.M. gefur hinn 7. júlí út fjögurra laga EP-plötu sem nefnist Reckoning Songs from the Olympia. Á henni eru lög af plötunni Reckoning frá árinu 1984 sem voru tekin upp á tónleikum í Dublin fyrir tveimur árum. Þessi EP-plata tengist tveimur öðrum útgáfum frá R.E.M., annars vegar tveggja diska endurútgáfu af Reckoning sem kom út fyrir skömmu og tvöfaldri tónleikaplötu, Live at the Olympia, sem er væntanleg í haust. Á henni verða lög sem voru einnig tekin upp í Dublin fyrir tveimur árum. R.E.M. er þessa dagana að undirbúa nýja hljóðversplötu sem mun fylgja eftir Accelerate.

Enduruppgötvaði Michael Jackson

Líkt og Fréttablaðið greindi frá í lok síðustu viku þá hefur verslunin Fígúra við Skólavörðustíg verið að selja sérstaka stuttermaboli til heiðurs poppgoðinu Michael Jackson. Guðjón Rúnar Emilsson, eigandi verslunarinnar, segir bolina hafa vakið nokkra athygli, sérstaklega meðal ferðamanna. „Hingað komu tveir Spánverjar sem höfðu þá ekki frétt af andláti Jacksons og þeir urðu því mjög hissa og nokkuð miður sín þegar þeir sáu bolina og fengu að vita að goðið væri látið,“ segir Guðjón sem hefur að eigin sögn enduruppgötvað tónlist Michaels Jackson. „Daginn eftir andlátið ákvað ég að leika aðeins Michael Jackson lög hér í versluninni og uppgötvaði fullt af lögum sem ég hafði ekki heyrt áður.“

Bræðingur úr öllum áttum

Platan Form Follows með Tonik kom út nýverið og er hún fáanleg á öllum helstu tónlistarveitum netsins, þar á meðal iTunes, Bandcamp og Gogoyoko. Tonik er hugarfóstur raftónlistarmannsins Antons Kaldals Ágústssonar og við gerð plötunnar fékk hann til liðs við sig þá Friðrik Sigurbjörn Friðriksson og Steingrím Þórarinsson á bassa og Þórð Hermannsson á selló. Anton segir að gaman hafi verið að vinna með þeim félögum. „Ég er alls ekki að segja að það sé nauðsynlegt að það sé lifandi hljóðfæri í lögunum en á móti kemur að það kemur oft mjög skemmtilegur kontrast í lagið,“ segir hann.

Snæddu kvöldverð

Nýlega sást til leikaranna Renée Zellweger og Bradley Cooper, sem fer með hlutverk í kvikmyndinni The Hangover, þar sem þau snæddu kvöldverð saman og létu vel hvort að öðru. „Hann kyssti hana á handarbakið þegar hann vísaði henni til sætis. Þau voru of náin til að geta talist aðeins vinir. Þau hvísluðu og hlógu allt kvöldið,“ sagði sjónarvottur. Fyrir ekki svo löngu héldu fjölmiðlar að Bradley þessi og leikkonan Jennifer Aniston væru að stinga saman nefjum. Bradley gaf svo frá sér yfirlýsingu í síðustu viku þar sem hann sagði að Aniston og hann væru aðeins góðir vinir.

Hótaði lækni lífláti

Hollenska fyrirsætan Karen Mulder var handtekin í París fyrir stuttu fyrir að hóta lækni lífláti. Fyrir­sætan vildi að lýtalæknir hennar lagfærði aðgerð sem hann hafði gert á henni en læknirinn, sem er kona, neitaði að verða við ósk hennar. Mulder hringdi þá ítrekað í lækninn og hótaði henni lífláti. „Hún öskraði og æpti í símann og var mjög æst. Hún hringdi ítrekað í lækninn, sem var orðin mjög skelkuð,“ var haft eftir einum lögreglumanni sem vann að málinu. Mulder hætti fyrirsætustörfum árið 1998, þá á hátindi ferils síns, og sagði að henni hefði ávallt þótt óþægilegt að láta mynda sig. Árið 2001 brotnaði hún niður í sjónvarpsviðtali þar sem hún sakaði föður sinn um að hafa dáleitt sig sem barn. Hún sagði jafnframt að nafntogað fólk innan tískubransans hefði hana sem kynlífsþræl.

Dansvænt og dúnmjúkt

Franska hljómsveitin Phoenix hefur fengið mikið lof fyrir sína fjórðu plötu sem kom út á dögunum. Dansvænt og dúnmjúkt poppið er þar allsráðandi.

Courtney Love of grönn

Söngkonan Courtney Love sagði nýverið í viðtali að hún væri orðin of grönn. „Ég veit að ég er orðin of grönn. Ég veit að ég þarf að taka mig á. Ég ætla mér að bæta á mig nokkrum kílóum í þessum mánuði og mig dauðlangar að fitna aðeins. Mér finnst ég líta betur út þegar ég er með eitthvað utan á mér. Læknirinn minn er búinn að sjá til þess að ég fái vítamínsprautur og sagði mér að byrja að borða vel og stunda líkamsrækt,“ sagði söngkonan. Hún kennir stressi um þyngdar­tapið og segir að síðustu mánuðir hafi verið henni mjög erfiðir.

Bob Dylan á Beastie-plötu

Goðsögnin Bob Dylan verður í gestahlutverki á næstu plötu Beastie Boys, Hot Sauce Committee, sem kemur út 15. september. Ekki er um hefðbundið samstarf að ræða heldur hefur bútur úr Dylan-lagi verið sniðinn inn í eitt lag á plötunni. Dylan mun vera mikill aðdáandi Beastie Boys og hrósaði piltunum nýverið í útvarpsþætti sínum fyrir húmor þeirra og skemmtilega texta. „Hann spilaði eitt af lögunum okkar og talaði um okkur,“ sagði Ad-Rock úr Beastie Boys. „Hann er mikill aðdáandi.“ Á meðal annarra gesta á plötunni verða Nas og Santigold.

Þarf að rífa sólstofuna

Popparinn og Íslandsvinurinn Cliff Richard er með böggum hildar eftir að honum var skipað að rífa sólstofu sem hann hafði reist við hús sitt í Surrey. Byggingaryfirvöld þar um slóðir könnuðust ekki við að hafa veitt leyfi fyrir sólstofunni og hafa skipað hinum aldna söngvara að rífa hana.

Siggi Hlö opnar sig

Í kvöld í sjónvarpsþættinum Ísland í dag opnar plötusnúðurinn Siggi Hlö sig en hann gaf nýlega út diskinn „Veistu hver ég var" sem inniheldur öll bestu lög áttunda áratugarins. Þá útskýra leikararnir Rúnar Freyr og Jóhann Þór fyrir áhorfendum af hverju karlmenn kunna ekki að versla skó, og að konur hafa ekki alltaf rétt fyrir sér. Einnig verður óhugnanlegt myndband hljómsveitarinnar Berndsen þar sem blóð kemur mikið við sögu sýnt.

Ragnhildur í spjallþætti Tom Green þegar Jackson dó

Kanadíski spéfuglinn, þáttastjórnandinn og tónlistarmaðurinn Tom Green er þekktur fyrir flest annað en lognmollu eins og þeir vita mætavel sem fylgdust með þáttum hans á MTV hér áður fyrr og nú þættinum Tom Green´s House Tonight sem sendur er út á Netinu.

Skjólstæðingur Bubba leikur vöðvatröll á Akureyri

„Ég hélt eiginlega að það væri verið að grínast í mér þegar þau hringdu. Ég hló bara,“ segir Eyþór Ingi Gunnlaugsson söngvari. Eyþór hefur verið ráðinn í hlutverk Rockys í uppsetningu Leikfélags Akureyrar á Rocky Horror Picture Show næsta vetur. Rocky er hinn fullkomni karlmaður sem Frank N Furter skapar og sprangar hálfber um sviðið í sýningunni. Eyþór skilur ekki alveg hvernig leikhúsfólk á Akureyri sá hann fyrir sér í hlutverkinu. „Ég hlýt að sjá mig eitthvað í röngu ljósi. Ætli ég verði ekki að fara að pumpa,“ segir hann hress í bragði.

Jörundur fastráðinn í Borgarleikhúsið

Jörundur Ragnarsson leikari hefur ráðið sig til tveggja ára hjá Borgarleikhúsinu. „Það leggst bara æðislega vel í mig,“ segir Jörundur. „Borgarleikhúsið er að gera góða hluti, fram undan eru frábær verkefni og ótrúlega spennandi vetur. Ég hlakka mikið til.“

Björgólfur og Sturla vörubílstjóri saman í mynd

Fjöldi heimildarmynda er í vinnslu um íslenska efnahagshrunið. Fyrsta myndin er að verða klár en hún verður frumsýnd á sögulegum degi.

Dauði Jacksons verður sirkus

Afþreyingarheimurinn í Bandaríkjunum hefur staðið kyrr síðan Michael Jackson lést á fimmtudaginn úr hjartaáfalli. Enda snýst allt um andlát poppguðsins.

Íslenskt forrit á heimsmarkað

Jón Eðvald Vignisson stofnaði, ásamt nokkrum félögum sínum, lítið hugbúnaðarfyrirtæki, fyrir einu og hálfu ári. Í dag vinna tólf manns hjá fyrirtækinu og stefnt er með afraksturinn, Clöru, á erlendan markað næsta haust.

Miði eða minjagripur

Þeir aðdáendur Michaels Jackson sem keyptu miða á endurkomutónleika hans í London geta fengið miðann sinn endurgreiddan eða fengið sendan til sín miða sem minjagrip.

Salander kemur til Íslands

Sænska leikkonan, Noomi Rapace, sem leikur tölvuþrjótinn Lisbeth Salander í kvikmyndinni Karlar sem hata konur, verður viðstödd frumsýningu myndarinnar þann 22. júlí í Smárabíói. Noomi, sem á íslenskan stjúpföður og er altalandi á íslensku, hyggst eyða nokkrum dögum hér á landi ásamt fjölskyldu, en með henni í för verða börnin hennar tvö og maðurinn hennar, leikarinn Ole Rapace, sem aðdáendur sjónvarpsþáttarins Önnu Pihl ættu að kannast við í hlutverki Daníels.

Sara Marti lærir leikstjórn í London

Sara Marti Guðmundsdóttir leikkona ætlar í leikstjórnarnám í Central School of Speach and Drama í London í október. Hún sleppir því hlutverki sínu í uppsetningu Þjóðleikhússins á Fridu, en sýningar byrja í haust. Sara er ein af fjórum sem fengu inngöngu í leikstjórn en alls verða 20 manns með henni í mastersnámi á hinum ýmsu sviðum leiklistar. Mörg þúsund manns sækja um inngöngu ár hvert.

Spacey pirraður

Leikarinn Kevin Spacey er orðinn pirraður á sífelldum sögusögnum um andlát fræga fólksins. Eftir að Michael Jackson og leikkonan Farrah Fawcett létust í síðustu viku hefur farið orðrómur í gang um dauða Jeff Goldblum, Britney Spears og George Clooney. Sagt var að Goldblum hefði látist á Nýja Sjálandi við tökur á sinni nýjustu mynd, en upplýsingafulltrúi hans var fljótur að vísa fregnunum til föðurhúsanna.

Syngja fyrir afslappaða þjóð

„Þetta er stuttur og góður túr. Við erum farnir að gera þetta á hverju sumri,“ segir Kristján Kristjánsson, KK, sem er á leið í tónleikaferð um landið með Magga Eiríks. Tilefnið er útgáfa af Ferðalagaplötum þeirra þremur í einum veglegum pakka ásamt söngvabók með öllum textunum og gítargripunum.

Lík Jacksons flutt á Neverland á fimmtudag

Lík Michaels Jacksons verður flutt á Neverland búgarðinn á fimmtudagsmorgun en konungurinn verður kistulagður daginn eftir. Hann verður svo jarðsunginn á sunnudag eftir því sem slúðurvefsíðan TMZ heldur fram.

Vita fátt betra en hjólhýsin

Í kvöld heimsækir sjónvarpsþátturinn Ísland í dag elsta hjólhýsahverfi landsins sem fer vaxandi en gríðarleg vinna hefur verið lögð í lóðirnar í hverfinu. Áhorfendur fá að kíkja inn í nokkur hjólhýsanna þar sem rætt er við heimamenn sem vita fátt betra en hjólhýsin. Ísland í dag hefst klukkan 18:55 strax að loknum fréttum Stöðvar 2.

Haffi Haffi og léttklæddar dansmeyjar - myndband

Á meðfylgjandi myndbandi má sjá söngvarann Haffa Haff, léttklædda dansara og Írisi Hólm koma fram á Broadway með Micha Moor og INNA og frumflytja lagið Control. Sjá má flutninginn hér í heild sinni. Haffi og Íris fljúga til Möltu næstkomandi fimmtudag til að syngja lagið Control og Give me sexy í sjónvarpi í beinni útsendingu á Ungfrú Malta.

Kalli Bjarni í æfingabúðum með glænýrri hljómsveit

„Ég fann reyndar Idol-jakkann minn á sunnudaginn. Örugglega bara merki frá æðri máttarvöldum,“ segir Karl Bjarni Guðmundsson, betur þekktur sem Kalli Bjarni.

South River með Guðrúnu

Hljómsveitin South River Band og söngkonan Guðrún Gunnarsdóttir ætla að leggja land undir fót og halda þrenna tónleika á næstunni. Fyrstu tónleikarnir verða á Gömlu-Borg í Grímsnesi á miðvikudag, þeir næstu á Café Rosenberg 8. júlí og þeir síðustu á Kumlinge á Álandseyjum 10. júlí. Allir hefjast þeir klukkan 21. Efnisskrá tónleikanna verður blanda af gömlu og nýju efni auk laga Guðrúnar. Núverandi meðlimir South River Band eru Helgi Þór Ingason, Ólafur Sigurðsson, Matthías Stefánsson, Ólafur Þórðarson og Grétar Ingi Grétarsson.

Beggi og Pacas selja píanó

„Við höfum fengið mjög góð viðbrögð, öll jákvæð, og fólk er mjög opið fyrir þessu. Það eru eiginlega allir sammála um að þetta sé tíminn til að fara með svona hlut af stað,“ segir Geir Sveinsson, fyrrverandi handboltakappi.

Rebekka meðal þeirra vinsælustu

Samkvæmt vefsíðu hins virta ljósmyndatímarits Photo District News, pdnonline.com, er íslenski ljósmyndarinn Rebekka Guðleifsdóttir meðal fimm vinsælustu ljósmyndara internetsins. Samkvæmt Pdnonline er talið að yfir sex milljónir gesta hafi heimsótt Flickr-vefsíðu hennar. Fram kemur í greininni að erfitt sé að meta vinsældir á ljósmyndavefsíðunni Flickr en fáir geti státað af jafn góðum árangri og Rebekka. Enda hafi hróður hennar borist víða, greinar um hana hafi birst í tímaritum og blöðum beggja vegna Atlantshafsins.

Lautarferðir á Lækjartorgi í sumar

Landnemahópur Vinnuskólans ætlar að grilla á Lækjartorgi í hádeginu á virkum dögum í sumar undir leiðsögn leikarans Ívars Arnar Sverrissonar, sem hefur verið ráðinn Landnámsmaður miðbæjarins. Fólk er hvatt til að taka með sér samloku, pylsu eða uppáhaldssteikina sína í nesti og grilla með hjálp Vinnuskólans.

Selið á Stokkalæknum opnað

Á laugardag verða haldnir tónleikar í fyrsta sinn í Selinu á Stokkalæk á Rangárvöllum. Þar mun Víkingur Heiðar Ólafsson píanóleikari koma fram á tvennum tónleikum ásamt þeim Höllu Oddnýju Magnúsdóttur píanóleikara og Huldu Jónsdóttur fiðluleikara.

Hellvar til Berlínar

Hljómsveitin Hellvar heldur tónleika í Berlín 4. júlí næstkomandi. Um næstum því árvissan viðburð er að ræða hjá sveitinni, sem var einmitt stofnuð í borginni 2004.

Vel heppnuð endurkoma

Fersk Jackson-lög

Will.i.am úr hljómsveitinni Black Eyed Peas tók upp nýtt efni með Michael Jackson áður en hann lést. Hljómurinn var bæði ferskur og áræðinn. „Þessi lög kröfðust þess af fólki að fara út á dansgólfið. Auðvitað voru þau melódísk," sagði hann.

Börnin áfram hjá ömmu

Börnin þrjú sem poppkóngurinn Michael Jackson lætur eftir sig munu vera hjá ömmu sinni Katherine Jackson til 3. ágúst. Þann dag verður úrskurðað fyrir rétti hver mun hafa forræði yfir börnunum. Móðir Jacksons nýtur einnig þjónustu lögfræðinga við ná umráðarétti yfir eignum fallna goðsins.

Eldheitur Logi og Eiður Smári

Í kvöld klukkan 18:55 í sjónvarpsþættinum Ísland í dag kynnumst við 12 ára hetju sem berst við hvítblæði og átti þann draum heitastan að hitta Eið Smára Guðjohensen sem varð við ósk hans og gerði reyndar gott betur eins og við sjáum í þætti kvöldsins. Þá fóru liðsmenn Ísland í dag líka í eldheitt partý til Loga Geirssonar handboltakappa síðasta laugardag.

Pönkuð Hermione

Leikkonan Emma Watson, sem þekktust er fyrir hlutverk sitt sem hin siðprúða Hermione í Harry Potter myndunum, sýnir á sér spánnýja hlið í nýjasta hefti Elle.

Fjör hjá Hemma og félögum

Hermann Hreiðarsson blés til styrktargolfmótsins Herminator Invitational í Vestmannaeyjum á laugardag. Heiðursgestur mótsins var Sol Campbell, félagi Hermanns hjá Portsmouth. Fjölmargir þjóðþekktir Íslendingar tóku þátt í mótinu sem var afar vel heppnað.

Ný ræðukeppni veldur usla

„Þetta er yndislegur heimur fyrir fólk að detta inn í og hafa áhuga á,“ segir Bragi Páll Sigurðarson sem ætlar að halda ræðukeppni fyrir almenning í sumar.

Þjóðlög á mynddiski

Það styttist í Þjóðlagahátíðina á Siglufirði sem haldin er í tíunda sinn en hún verður sett á miðvikudag. Í tilefni af afmælinu og aldar útgáfuafmælis þjóðlagasafns sr. Bjarna Þorsteinssonar gefur Þjóðlagasetrið á Siglufirði út stórglæsilegan mynddisk með upptökum sem setrið hefur gert á árunum 2005 til 2009. Alls koma fram á diskinum um 50 manns á öllum aldri og víðs vegar að af landinu. Þar á meðal eru 30 kvæðamenn og 20 manna dansflokkur sem sýnir íslenska þjóðdansa. Þá er leikið á langspil og íslenska fiðlu.

Sest á skólabekk í haust

Ísgerður Elfa Gunnarsdóttir hyggst setjast aftur á skólabekk í haust og mun stunda nám í stjórnmálafræði við Háskóla Íslands. „Þetta er búið að blunda í mér í svolítinn tíma. Ég er búin að vera að spá í framhaldsnámi í næstum þrjú ár en alltaf hætt við þar til núna," segir Ísgerður Elfa. Hún segist kvíða því svolítið að hefja bóklegt nám aftur en hlakkar einnig mikið til að takast á við háskólanámið.

Gómsætar minningar

„Upprunalega hugmyndin varð til í kringum vinnu í stuttum kúrs við Listaháskólann. Þar áttum við að vinna verkefni fyrir sælgætisverksmiðjuna Nóa Síríus. Ég ákvað svo að halda verkefninu áfram og notaði hugmyndina í lokaverkefnið mitt og þróaði það töluvert og við það breyttist konseptið og ég hætti að vinna með klisjur og fór að vinna meira með raunveruleikann," segir Arna Rut Þorleifsdóttir vöruhönnuður um minjagripi sem hún hefur hannað.

Framtíð litla Bretlands óljós

David Walliams og Matt Lucas, mennirnir á bak við bresku gamanþættina Little Britian, hafa fengið nóg af þáttunum í bili og ætla ekki að gera fimmtu seríuna eins og leit út fyrir um tíma.