Þrjár umsóknir bárust um sérleyfi til rannsókna og olíuvinnslu á Drekasvæðinu. Íslendingar eru aðilar að þeim öllum og reynd bresk leitarfélög standa að tveimur umsóknanna. Orkumálastjóri segir útkomuna framar björtustu vonum.

Það var á slaginu klukkan fjögur sem orkumálastjóri lýsti því yfir að ekki yrði tekið við fleiri umsóknum í þessu öðru útboði Íslendinga. Í fyrsta útboðinu fyrir þremur árum bárust tvær umsóknir en nú komu þrír kassar í hús Orkustofnunar, frá Eykon Energy, sem er óskráð félag, frá Faroe Petroleum og Íslensku kolvetni ehf., og frá Valiant Petroleum og Kolvetni ehf.

Guðni A. Jóhannesson orkumálastjóri segir þetta mjög góða útkomu. "Og stendur framar okkar björtustu vonum," sagði Guðni í viðtali í fréttum Stöðvar 2.

Hann bendir á að þarna séu mjög reynd leitarfyrirtæki sem komi að þessu og félög með reynslu af þessum slóðum. "Þannig að ég verð að segja að mér finnst þessi útkoma mjög jákvæð."

Valiant Petroleum er stærst félaganna, ef miðað er við veltu. Það er með höfuðstöðvar í útjaðri London í Englandi, stundar olíuvinnsla í Norðursjó og er í olíuleit við Noreg og Færeyjar. Það hafði 65 milljarða króna tekjur í fyrra og er með um 60 starfsmenn.

Faroe Petroleum hét upphaflega Føroya Kolvetni þegar það var stofnað í Færeyjum fyrir fimmtán árum en er nú orðið alþjóðlegt félag með höfuðstöðvar í Aberdeen í Skotlandi. Það er í olíuleit og vinnslu í lögsögu Bretlands, Noregs og Færeyja, var með 16 millarða tekur í fyrra og um 50 starfsmenn.

Gunnlaugur Jónsson, stjórnarformaður Kolvetna ehf. segir að þessi tvö félög, Valiant Petroleum og Faroe Petroleum, séu hvort tveggja alvöru félög í slíkri starfsemi. "Þannig að þetta er gott," segir Gunnlaugur um útkomuna.

Óvæntasti umsækjandinn er félagið Eykon Energy, og er nafnið til heiðurs Eyjólfi Konráð Jónssyni alþingismanni, sem var þekktur baráttumaður fyrir landgrunnshagsmunum Íslendinga. Heiðar Már Guðjónsson, stjórnarformaður Eykons, segir félagið vinna þetta mjög langt fram í tímann.

"Við erum með alþjóðlega fjárfesta, sérstaklega alþjóðleg olíuleitarfyrirtæki, sem við þekkjum vel, og hafa unnið á svipuðum slóðum og líka erfiðari slóðum heldur en þar er, á Jan Mayen-hryggnum. Þannig að við erum bara að reyna að forvinna málið þannig að þeir komi síðan að þessu með okkur," segir Heiðar Már.

Oddný Harðardóttir iðnaðarráðherra, sem jafnframt er fjármálaráðherra, var viðstödd þegar tilkynnt var um umsækjendur í Orkustofnun síðdegis. Hún lýsti mismunandi sviðsmyndum um hvaða áhrif olíuleit gæti haft á ríkissjóð og sagði þá bjartsýnustu gera ráð fyrir að eftir tíu ár gætu farið að koma tekjur og þær gætu orðið óhemju miklar í stuttan tíma.

Orkustofnun mun nú fara yfir umsóknirnar og úthluta rannsóknar- og vinnsluleyfum eigi síðar en í lok nóvember.