Sprenging í Rúmeníu

Að minnsta kosti einn lét lífið og 3 slösuðust þegar sprenging varð í verksmiðju í Suður-Rúmeníu í dag. 1000 íbúðir í nálægum byggingum eyðilögðust og fjölmargir bílar einnig sem lagt hafði verið í næsta nágrenni. Ekki liggur fyrir hvað olli sprengingunni.

Högnuðust um 27 milljarða króna

Straumur-Burðarás hagnaðist um nær 27 milljarða króna á síðasta ári, þar af er nær helmingur hagnaðarins tilkomin af síðustu þremur mánuðum síðasta árs.

Aldrei fleiri farþegar

Farþegar Icelandair hafa aldrei verið fleiri en á síðasta ári. Þeir voru rúmlega ein og hálf milljón talsins og fjölgaði um fimmtán prósent milli ára.

Gengu of hart fram gegn starfsmönnum

Fasteignamati ríkisins er ekki heimilt að fara með tölvupóst starfsmanna stofnunarinnar eins og hann sé eign stofnunarinnar. Þetta segir í áliti Persónuverndar á reglum sem Fasteignamat ríkisins setti um tölvupóst- og netnotkun starfsmanna.

Hamasliðar kokhraustir

Forsætisráðherra Palestínu hefur sagt af sér en í þingkosningunum í gær náðu hin herskáu Hamas-samtök það góðum árangri að þau hljóta að teljast sigurvegarar kosninganna. Hamas-liðar eru kokhraustir og hafa lýst yfir fullnaðarsigri í þingkosningunum.

Frítt í sund fyrir börn í Reykjanesbæ

Börn í Reykjanesbæ munu framvegis fá frítt í sund samkvæmt ákvörðun bæjarstjórnar Reykjanesbæjar, sem tók gildi um síðustu áramót. Börn í Reykjanesbæ hafa tekið þessum breytingum vel en í fyrstu viku janúarmánaðar höfðu tæplega þrefalt fleiri börn komið í sund en á sama tíma árið á undan. Er þetta liður í stefnu bæjaryfirvalda að stuðla að fjölskylduvænu samfélagi. Fréttavefurinn Víkurfréttir greinir svo frá.

L-listinn í Skeiða og Gnúpverjahreppi leysist upp

L-listinn í Skeiða- og Gnúpverjahreppi, listi áhugafólks um farsæla sameiningu, býður ekki fram í komandi sveitarstjórnarkosningum. Þetta kemur fram á fréttavefnum sudurland.net. L-listinn fékk hreinan meirihluta í síðustu sveitarstjórnarkosningum, fékk fjóra fulltrúa en A-listi framfarasinna 3. Langvinn deila um skólamál í hreppnum er ein aðalskýring þessarar ákvörðunar fulltrúa L-listans.

Börnin á Sólhlíð halda upp á Ljósahátíð

Börnin á leikskólanum Sólhlíð í Engihlíð héldu sína árlegu Ljósahátíð í morgun. Krakkarnir voru að vonum spenntir enda ekki á hverjum degi sem þau mæta með vasaljós í leikskólann.

Neitar að hafa ætlað að nota búnaðinn

Búlgarinn, sem handtekinn var fyrir að flytja til landsins búnað til að afrita greiðslukort og misnota reikninga, gengur laus þar sem búnaðurinn er ekki ólöglegur fyrr en hann er notaður ólöglega og maðurinn neitar að hafa ætlað að gera það.

Skýrsla um gengismál

Ný skýrsla um íslensku krónuna segir að fleiri gallar en kostir fylgi því að taka upp Evruna á Íslandi. Skýrslan var kynnt á ráðstefnu sem haldin var á Nordica Hótel í morgun sem bar yfirskriftina "horft til framtíðar".

Geðsjúkir vilja önnur meðferðarúrræði en lyfjameðferðir

Geðsjúkir og fjölskyldur þeirra segja lítið tillit tekið til skoðanna þeirra í geðheilbrigðisþjónustu á Íslandi. Geðsjúkir telja kominn tíma á að horfa til annarra meðferðarúrræða en lyfjameðferðar.

Forsætisráðherra Palestínu segir af sér

Ahmed Qurie, forsætisráðherra Palestínu hefur sagt af sér og ríkisstjórnin öll. Þá hafa Hamas-samtökin lýst því yfir að þau hafi sigrað þingkosningarnar í Palestínu.

KB-banki skilar methagnaði

Hagnaður KB banka á síðasta ári eftir skatta, nam tæpum fimmtíu milljörðum króna og jókst um rúm hundrað áttatíu og tvö prósent á milli ára.

Stýrivextir hækka í 10,75 prósent

Seðlabanki Íslands mun hækka stýrivexti sína um 0,25 prósentustig frá og með 1. janúar. Stýrivextir verða því 10,75 prósent.

Gamla Austurbæjarbíó gert upp

Gamla Austurbæjarbíóið gengur nú í endurnýjun lífdaga. Verið er að gera húsið upp og við þá vinnu hefur ýmislegt komið í ljós. Til stendur að nýta húsið til ýmissa menningar- og listaviðburða.

Sjálfstæðisflokkurinn með mesta fylgið

Tæp 44% Reykvíkinga segjast myndu kjósa Sjálfstæðisflokkinn yrði boðað til Alþingiskosninga núna, samkvæmt nýrri skoðanakönnun Fréttablaðsins, en kjörfylgi flokksins í Reykjavík var 37% í síðustu kosningum.

Nýtt móðurfélag VÍS

Stjórn Vátryggingafélag Íslands hefur samþykkt nýtt stjórnskipulag fyrir félagið í samræmi við stóraukin umsvif þess og framtíðaráherslur. VÍS eignarhaldsfélag er heiti á nýju móðurfélagi sem Finnur Ingólfsson mun veita forstöðu. Undir hið nýja félag heyra sjö sjálfstæð dótturfélög á sviði trygginga-, öryggis- og fjármálaþjónustu.

Hæstiréttur staðfestir farbannsúrskurð héraðsdóms

Hæstiréttur staðfesti í gær farbannsúrskurð Héraðsdóms yfir manni, sem er grunaður um að hafa smyglað fjórum kílóum af hassi og einu kílóii af anfetamíni með Norrænu hingað til lands fyrr í mánuðinum. Hann var handtekinn tveimur dögum eftir komuna og úrskurðaður í gæsluvarðhald, sem er runnið út, en sætir nú farbanni.

Vinnuslys í Sandgerði

Starfsmaður í fiskvinnslufyrirtæki í Sandgerði, sem var einn við vinnu í gærkvöldi, slasaðist alvarlega á fæti, en gat af eigin rammleik leitað aðstoðar. Honum skrikaði fótur og og lenti ofan í snigli, með þeim afleiðingum að hann missti nokkrar tær áður en hann náði að rífa sig lausan úr sniglinum og leita hjálplar í næsta fyrirtæki.

Loðnunnar leitað

Dauðaleit er að hefjast að loðnu við landið þar sem leit hafrannsóknaskips og nokkurra loðnuskipa um hríð, hefur ekki borið meiri árangur en svo, að ekki er enn hægt að gefa út kvóta, eða veiðiheimildir fyrir vertíðina. Vertíðin er oft komin í fullan gang um þetta leiti.

Tæki til kortalesturs gerð upptæk á Seyðisfirði

Tollgæslan á Seyðisfirði fann fjögur sér smíðuð tæki til að setja framan á hraðbanka til að geta lesið kortanúmer og misnotað síðan viðkomandi reikninga. Tækin fundust þegar tollverðir gerðu leit á manni með búlgarskt vegabréf, eftir að hann kom með Norrænu til Seyðisfjarðar á þriðjudaginn.

Símaráðgjöf fyrir barnaníðinga

Barnaníðingar geta nú leitað sér aðstoðar í Danmörku, nafnlaust. Heilbrigðisráðuneyti hefur ákveðið að koma á fót símaráðgjöf fyrir barnaníðinga á danska ríkissjúkrahúsinu. Þjónustusíminn er hugsaður fyrir barnaníðinga sem vilja leita sér aðstoðar en hann verður opinn í einn til fjóra tíma á viku.

Emiliana og Sigur Rós með þrenn verðlaun

Íslensku tónlistarverðlaunin voru afhent í Þjóðleikhúsinu í kvöld. Flest verðlaut hlutu Emiliana Torrini og Sigur Rós eða þrenn verðlaun hvor. Bestu hljómplötu ársins átti Benni Hemm Hemm og var hann líka valinn bjartasta vonin. Þá var Mugison valin vinsælasti flytjandinn á visir.is og vinsælasta lagið valið af notendum tonlist.is var My Delusions með Ampop.

Styttist í prófkjör Framsóknarflokksins

Ekki hefur verið boðinn fram B listi Framsóknarflokksins í borginni síðan árið 1990. Prófkjör flokksins fyrir borgarstjórnarkosningarnar í vor verður um helgina og hefur utankjörfundarkosning gengið vel.

Ágreiningur um stækkun álvers í bæjarstjórn Hafnarfjarðar

Djúpstæður ágreiningur er í bæjarstjórn Hafnarfjarðar um stækkun álversins í Straumsvík og meirihluti Samfylkingarinnar er klofinn. Þrátt fyrir andstöðu er þó líklegast að framkvæmdaleyfið verði veitt, fyrir tilstilli minnihluta sjálfstæðismanna í bæjarstjórn.

Krónan helsta útflutningsvaran

Krónan er orðin helsta útflutningsvara Íslands, segir Kristján L. Möller, þingmaður Samfylkingarinnar, sem óttast að frekari vaxtahækkanir Seðlabankans á morgun geri stöðu útflutningsatvinnugreina enn erfiðari en hún er þegar orðin.

Starfsmönnum fækkað um hátt í 60

Starfsmönnum HB Granda á Akranesi hefur fækkað um hátt í sextíu á rúmu ári frá því fyrirtækið varð til við sameiningu Haralds Böðvarssonar á Akranesi og Granda í Reykjavík.

Álver í Straumsvík og á Norðurlandi ekki aðskilin mál

Bæjarstjórinn á Akureyri segist ekki trúa því að farið verði í stækkun álversins í Straumsvík þannig að Norðlendingar verði hornreka í atvinnuuppbyggingu.

Verkfalli flugmanna SAS í Danmörku er lokið

Flugmenn SAS í Danmörku ákváðu í dag að snúa aftur til vinnu eftir að hafa fundað með stjórnendum félagsins.

Google ritskoðað í Kína

Kínverjar geta senn farið að notfæra sér Google-leitarvélina á Netinu, en böggull fylgir skammrifi. Leitarvélin verður stillt þannig að tiltekin leitarorð sem tengjast pólitísku andófi skila engum niðurstöðum.

Íranar fagna tilboði Rússa

Íranar fagna tilboði stjórnvalda í Moskvu um að Rússar auðgi úran fyrir þá en segja nauðsynlegt að útfæra tilboðið betur. Stjórnvöld í Teheran hóta því að hefja auðgun úrans af fullum krafti ef kjarnorkudeilu þeirra við Vesturveldin verði vísað til Öryggisráðs Sameinuðu þjóðanna.

Leynd yfir ofurkjörum og starfslokasamningum

Fyrirtæki sem ekki eru skráð í Kauphöllinni þurfa ekki að upplýsa í ársreikningum um ofurkjör eða starfslokasamninga stjórnenda sinna. Þau falla undir reglur Fjármálaeftirlitsins um upplýsingaskyldu sem ganga ekki jafn langt. Viðskiptaráðherra segir ekki á dagskrá að gera Lífeyrissjóðum skylt að birta slíkar upplýsingar í ársreikningi.

Ísraelar hindruðu kosningar í Austur-Jerúsalem

Mikil spenna ríkti á herteknu svæðunum í Palestínu enda hafa þingkosningar ekki farið þar fram í áratug. Í Austur-Jerúsalem fékk aðeins brot kjósenda að neyta atkvæðisréttar.

Spár benda til að Fatah fái flest atkvæði

Fyrstu útgönguspár benda til að Fatah-hreyfing Mahmouds Abbas hafi fengið um 46 prósent atkvæða í palestínsku þingkosningunum sem fram fóru í dag. Að því er Reuters-fréttastofan hermir fengu hin herskáu Hamas-samtök rétt rúmlega þrjátíu prósent.

Stjórnvöld taka alþjóðlegar skuldbindingar sínar ekki alvarlega

Umhverfisverndarsinnar segja að íslensk stjórnvöld taki alþjóðlegar skuldbindingar sínar ekki alvarlega. Stækkun álversins í Straumsvík myndi klára mengunarkvóta Íslands, samkvæmt Kyoto-bókuninni.

Í farbann vegna dópsmygls

Hæstiréttur hefur dæmt mann í farbann meðan réttað er í máli gegn honum vegna stórfellds fíkniefnasmygls. Maðurinn er talinn hafa smyglað tæpum fjórum kílóum af hassi og einu kílói af amfetamíni sem voru falin í bíl sem kom hingað með Norrænu frá Danmörku þrettánda þessa mánaðar.

Langtímasamningur í sjónmáli

Samningar milli Landsspítala-háskólasjúkrahús og Art Medica um tæknifrjóvganir bíða endurnýjunar en vonir eru bundnar til að langtímasamningur náist um næstu mánaðarmót. Bráðabirgðasamningar hafa hingað til skapað nokkurra óvissu meðal þeirra sem bíða tæknifrjógvunaraðgerða.

Mikilvægt að fá fagmann til að tengja gaseldavélar á heimilum

Gasnotkun á heimilum hefur verið að aukast á síðustu árum en gaseldavélar og gashelluborð hafa sjaldan verið eins vinsæl. Óhætt er að segja að lítill blossi geti hæglega valdið miklu báli sé ekki fyllsta öryggis gætt. Mikilvægt er að vanda til verka þegar gas er tengt við eldunartæki á heimilum og þá þarf að yfirfara búnaðinn reglulega.

Gæludýr á um 30% heimila í landinu

Íslendingar eru greinilega miklir dýravinir en gæludýr eru á um þriðjungur heimila í landinu. Kettir eru vinsælastir allra gæludýra og þar á eftir kemur besti vinur mannsins, hundurinn.

Best að sitja sem fastast

Kristinn H. Gunnarsson segist ekki á þeim buxunum að segja af sér þingmennsku þrátt fyrir harða gagnrýni Gunnars Braga Sveinssonar, sveitarstjórnarmanns og miðstjórnarmanns í Framsóknarflokknum, sem segir réttast að Kristinn láti af þingmennsku.

Fækkar sveitarfélögum enn?

Atkvæðagreiðsla um sameiningu Ólafsfjarðarbæjar og Siglufjarðarkaupstaðar í eitt sveitarfélag fer fram næstkomandi laugardag. Íbúar sveitarfélaganna tveggja samþykktu tillögu um sameiningu allra sveitarfélaga við Eyjafjörð í október 2005 og því verður kosið aftur í sveitarfélögunum tveimur. Samþykki íbúar þeirra sameiningu verður til nýtt sveitarfélag með 2.300 íbúa. Við það mun sveitarfélögum í landinu enn fækka og verða þau þá 85 er gengið verður til sveitarstjórnarkosninga í vor.

Þoka á Hellisheiði og í Þrengslum og víða hálka

Í tilkynningu frá Vegagerðinni nú síðdegis kemur fram að þoka er á Hellisheiði og í Þrengslum og ýmist hálka eða hálkublettir á milli Kvískerja og Víkur í Mýrdal, á Sunnanverðum Vestfjörðum, á Eyrarfjalli, Steingrímsfjarðarheiði, Vatnsskarði, Öxnadalsheiði, Lágheiði og víða á Norðausturlandi.

Refsingar krafist vegna einkadans í Goldfinger

Fyrirtaka var í dag í máli sem sýslumaðurinn í Kópavogi rekur á hendur rekstraraðila og tveggja dansmeyja næturklúbbsins Goldfinger fyrir brot á lögreglusamþykkt. Dansmeyjarnar tvær eru sakaðar um að hafa sýnt nektardans í lokuðu rými með viðskiptamanni í næturklúbbnum að kvöldi föstudagsins 7. október 2005. Rekstraraðili klúbbsins er sakaður um að hafa staðið fyrir sýningunni og krefst ákærandi þess að öll þrjú verði dæmd til refsingar.

Fljúga tvisvar í viku frá Akureyri

Iceland Express flýgur tvisvar í viku milli Akureyrar og Kaupmannahafnar í sumar. Flugið hefst 30. maí næstkomandi og kostar flugið hvora leið tæpar átta þúsund krónur auk flugvallarskatta. Flogið verður á þriðjudögum og fimmtudögum en farmiðasala hefst í næstu viku.

Leitarsveit SOS-barnaþorpanna hefur uppi á börnum í Pakistan

Þrátt fyrir erfiðar aðstæður, látlausar rigningar og snjókomu, umhverfis skjálftasvæðið í Pakistan hefur leitar- og hjálparsveit SOS-barnaþorpanna haldið áfram uppteknum hætti við að finna og skrá börn sem eru ein á báti eftir jarðskjálftana. Nú eru 129 slík börn í umsjá SOS-barnaþorpanna og hefur þeim verið komið fyrir í barnaþorpum eða í neyðarskýlum SOS til bráðabirgða.