Ferða­menn stundum slegið tvær flugur í einu höggi

„Þetta kemur mér ekkert stórkostlega á óvart. Við höfum séð hvali reglulega hérna hjá okkur, oftast seli svo sem, en hvalir koma alveg fyrir og við eigum bara mjög eftirminnileg augnablik með þeim. En þetta er reyndar í fyrsta sinn sem ég heyri af háhyrningum,“ segir Ragnheiður Harpa Haraldsdóttir, markaðs- og upplifunarstjóri Sky Lagoon, sem frétti af háhyrningunum frá samstarfsfólki sínu.

„Þetta er alltaf jafn magnað og mikil upplifun að sjá þetta og maður finnur það líka hjá gestunum. Þetta alveg gerir daginn og ferðina jafnvel.“

Eitt sinn hafi fjölskylda til að mynda verið búin að útbúa lista yfir hluti sem þau vildu upplifa í ferð sinni til Íslands og undir lokin einungis átt eftir að fara í Sky Lagoon og sjá seli.

„Þau voru á leiðinni upp á flugvöll þegar þau fóru til okkar og sáu selina þar. Þannig að fólk er alveg að slá tvær flugur í einu höggi þarna.“

Æpti þegar hann sá hval

Gaman sé fyrir gesti og starfsfólk að upplifa þetta saman: „Þetta er alveg ótrúlegt þegar þetta gerist,“ segir Ragnheiður.

Hún segir að dýrin stoppi yfirleitt stutt utan við lónið en selir séu þar eitthvað lengur. Eitt sinn hafi starfsmaður hrifist af fallegu sólarlagi og farið inn í gufubað eftir að gestir voru farnir til að taka upp myndband.

„Það er búið að loka og sólin er að setjast og hann tekur vídeó og svo bara allt í einu heyrist í honum hálfpartinn öskra, af því að það hoppar hvalur þarna upp úr sjónum.“

„Við erum bara ótrúlega heppin að fá að eiga svona mikla nánd við náttúruna innan höfuðborgarinnar,“ bætir Ragnheiður við.

Hjördís Lilja Lorange náði ljósmyndum af háhyrningunum tveimur í dag þegar þeir sáust synda nálægt landi í átt að Nauthólfsvík. Vöktu þeir mikla athygli meðal gesta sem flestir voru erlendir ferðamenn, að sögn Hjördísar. Hún hafi ekki orðið vör við háhyrninga á þessum slóðum áður, þrátt fyrir að vera vön því að synda í sjónum við Nauthólsvík og Gróttu.

Fréttin hefur verið uppfærð.