Þotum Icelandair lent í Reykja­vík

Snjó kyngdi niður á Keflavíkurflugvelli upp úr klukkan 14 í dag sem gerði snjóruðning erfiðan og dró úr skyggni við flugstöðina.

„Veður er að hafa áhrif á Keflavíkurflugvelli, vindur og blautur snjór, sem þýðir að það tekur lengri tíma að ryðja og tryggja bremsuskilyrði, sem þýðir að vélar eru í bið og eru að koma inn hver af annarri,“ sagði Guðjón Helgason upplýsingafulltrúi Isavia fyrr í dag.

Flugfélögin ákváðu að vísa vélunum til Reykjavíkur, Egilsstaða og Akureyrar eftir að hafa staðið í biðstöðu meðan þeim var fundinn nýr lendingastaður. Guðjón ítrekaði þó að hægt væri að lenda á Keflavíkurflugvelli, það taki bara lengri tíma vegna þess að það tekur tíma að ryðja brautirnar.

Bíða þess að fá að lenda

Ástandið stóð yfir til klukkan 16.30 en um það leyti lenti farþegaþota Icelandair frá Frankfurt í Keflavík. 

Aftur á móti segir Guðjón hjá Isavia að sautjáun vélar hafi þurft að hverfa frá lendingaráformum á Keflavíkurflugvelli.

Alls hafi sex vélar lent í Reykjavík; fimm Icelandair-vélar og ein hervél. Átta Icelandair-vélar hafi svo lent á Akureyri. Þrjár hafi lent á Egilsstöðum: tvær frá Icelandair og ein frá Discovery.

Flugfélögin taka nú ákvarðanir um næstu skref, þ.e. hvort flogið verði strax aftur til Keflavíkur. Hríð er aftur á móti nú skollin á í Reykjavík.

Ef vaktin birtist ekki er ráð að endurhlaða (e. refresh) síðunni.