Náðu sex byssum úr byssuskáp á Akur­eyri

Í tilkynningu Lögreglunnar á Norðurlandi eystra þess efnis segir að rannsókn málsins hafi hafist samstundis og á mánudagskvöldinu og aðfaranótt þriðjudags hafi þrír verið handteknir og húsleit framkvæmd á tveimur stöðum. Eitt skotvopn hafi fundist í upphafi rannsóknaraðgerða en sólarhring síðar, í gærkvöldi, hafi hin fimm skotvopnin fundist.

Hinir handteknu hafi verið látnir lausir að yfirheyrslum loknum en málið sé enn til rannsóknar.

„Í málinu voru skotvopnin vörsluð á viðeigandi hátt í skotvopnaskáp eins og lög gera ráð fyrir. Af skotvopnum stafar hins vegar alltaf hætta séu þau ekki í höndum réttra aðila. Þá eru stolin skotvopn einnig álitleg vara í ólöglegum viðskiptum og vill lögregla beina því til skotvopnaeigenda að tryggja vörslur þeirra á hverjum tíma og vera vakandi fyrir hvers kyns öryggisbrestum.“