Ind­verjar brjáluðust út í Messi og brutust inn á völlinn

Messi er á ferð um Indland þessa dagana og af því tilefni var reist rúmlega tuttugu metra há stytta af honum þar í landi.

Rúmlega áttatíu þúsund aðdáendur hans greiddu sig inn á Salt Lake völlinn í borginni Kolkata í gær til að líta litla snillinginn augum.

Andrúmsloftið var þó ekki lengi létt og skemmtilegt, heldur varð það fljótt mjög spennuþrungið, því afar fáir náðu að sjá Messi. Hann var umkringdur fólki, einhverjum öryggisvörðum en einnig indverskum ráðamönnum sem vildu vera hluti af göngunni og svo fjölskyldu og vinum sínum Luis Suarez og Rodrigo de Paul, þegar hann gekk út á völl.

„Bara aukaleikarar allt í kringum Messi. Til hvers vorum við að mæta?... Við keyptum miða fyrir 12.000 rúpíur [um 16.000 krónur] en fengum ekki einu sinni að sjá framan í hann“ sagði einn aðdáandinn við ANI fréttastofuna.

Fljótlega fóru að heyrast köll: „Við viljum Messi!“ og aðdáendurnir espuðust snöggt. Flöskum var kastað inn á völl, sæti voru rifin úr stúkunni, áhorfendur klifruðu yfir girðingar og lögreglan réði illa við mannfjöldann.

Messi tókst ekki að klára göngu sína, hringinn í kringum völlinn, og lét sig hverfa innan við hálftíma eftir að hann mætti á sviðið.

„Við höfum verið svikin, það er ekki hægt að segja annað. Samkvæmt dagskrá átti Messi að vera hér í einhverja tvo tíma“ sagði annar áhorfandi, gráti næst, við National Herald.

Dagskráin hjá Messi næstu daga telur fleiri heimsóknir, á tónleika, ungmennafótboltaleiki, padel mót og góðgerðaviðburði í borgunum Kolkata, Hyderabad, Mumbai og Nýju-Delí. Áhugavert verður að sjá hvort fleiri uppákomur verði á leiðinni eða hvort betur takist í skipulagi og öryggisgæslu.

Járnstyttan sem var reist af Messi í tilefni heimsóknarinnar er sú stærsta sinnar tegundar. Enginn íþróttamaður hefur fengið jafn stóra styttu gerða af sér og styttan er mun stærri en sú sem var reist til heiðurs Diegos Maradona í sömu borg. En líkt og með fræga brons styttu af Cristiano Ronaldo, sem var reist í Portúgal, virðist myndhöggvaranum ekki hafa tekist vel að fanga andlitsdrætti leikmannsins.