Fundað um frið í Abú Dabí

Dan Driscoll, ráðherra bandaríska hersins, hitti rússneska erindreka í morgun. Til stendur að funda frekar yfir daginn.

Driscoll hefur varið síðustu dögum í Úkraínu, þar sem hann reyndi fyrst að fá Úkraínumenn til að skrifa undir upprunalegu tillögurnar, sem lýst var sem óskalista Pútíns, og í Genf, þar sem hann tók þátt í viðræðum um tillögurnar og breytingar á þeim.

Sjá einnig: Hafna kröfu Rússa um undan­hald frá Dónetsk

Wall Street Journal hefur eftir einum af talsmönnum Hvíta hússins að Driscoll, sem sinnir borgaralegri stöðu sem snýr að því að halda utan um þjálfun og vopnun bandarískra hermanna, hafi verið valinn til verksins þar sem talið sé að Úkraínumenn og Rússar væru frekar til í að ræða við aðila sem tengjast herafla Bandaríkjanna en erindreka.

Leiðtogar bandaríska hersins hafa átt í nánu samstarfi við kollega sína og ráðamenn í Úkraínu.

Kynna nýjar tillögur fyrir Rússum

Driscoll mun í dag kynna tillögurnar nýju fyrir rússneskum erindrekum. Friðartillögurnar eru í nítján liðum en voru upprunalega í 28. Upprunalega skjalið tók töluverðum breytingum um helgina í viðræðum milli bandarískra erindreka annars vegar og úkraínskra og evrópskra erindreka hins vegar.

Sjá einnig: Tillögurnar taka breytingum og telja nú nítján atriði í stað 28

Mikil óreiða hefur einkennt tillögurnar, uppruna þeirra og tilgang á undanförnum dögum.

„Upplýsingaóreiða“ kringum friðaráætlunina

Dmitrí Peskóv, talsmaður Vladimírs Pútín, forseta Rússlands, lýsti ástandinu kringum tillögurnar sem „upplýsingaóreiðu“. Hann sagði að upprunalegu tillögurnar, sem Rússar hefðu fengið að sjá, hefðu geta verið notaðar til grunns frekari viðræðna.

Peskóv sagðist ekki geta tjáð sig um nýju tillögurnar þar sem þær hefðu ekki formlega borist Rússum.

Upprunalegu tillögurnar vöktu miklar áhyggjur í Kænugarði og öðrum höfuðborgum í Evrópu þegar þær litu fyrst dagsins ljós. Fyrst um sinn var óljóst hvort að friðaráætlunin væri í raun raunveruleg en hún mun hafa verið skrifuð af þeim Steve Witkoff, sérstökum erindreka Trumps, og Kirill Dmitríev, erindreka Pútíns.

Ráðamenn í Bandaríkjunum voru margsaga um uppruna friðaráætlunarinnar og hvaðan hún kom í rauninni en liðir áætlunarinnar hölluðu verulega á Úkraínumenn og sumir virtust upprunalega hafa verið skrifaðir á rússnesku.

Rannsóknarblaðamaðurinn Christo Grozev, sem hefur lengi einbeitt sér að Rússlandi og á sér langa sögu í því að fletta hulunni ofan af rússneskum njósnurum í Evrópu og víðar, sagði frá því um helgina að hann hefði séð nánast sömu tillögur og voru í friðartillögunum fyrir um hálfu ári síðan.

Lofaði Trump en gagnrýndi Evrópumenn

Sergei Lavrov, utanríkisráðherra Rússlands, sló á svipaða strengi og Peskóv í morgun. Hann sagði upprunalegu áætlunina hafa verið nothæfa til frekari viðræðna og neitaði að tjá sig um nýju áætlunina.

Þá lofaði hann Trump fyrir viðleitnina en gagnrýndi Evrópumenn, eins og hann hefur ítrekað gert, fyrir að reyna að grafa undan friði í Úkraínu. Hann sakaði ráðamenn Evrópu um að fremja skemmdarverk á friðarviðræðum og ýta undir nasisma, samkvæmt frétt rússnesku fréttaveitunnar TASS.

Ráðamenn í Rússlandi hafa ítrekað sakað ríki Evrópu og NATO um að bera ábyrgð á því að Rússar réðust inn í Úkraínu, á því að stríðið standi enn yfir og halda því fram að þeir hafi tafið mögulegar friðarviðræður.

Sjá einnig: Sakar Evrópu um stríðsæsingu

Lavrov sagði ráðamenn í Evrópu reyna að slá ryki í augu kjósenda sinna um ástandið í heimsálfunni, hvað varðar efnahagsmál og samfélagsmál.

Þá sagði hann að borgarar í Evrópu væru farnir að velta vöngum yfir því hvað gerðist næst, þar sem Úkraína „yrði ekki til staðar að eilífu“.

Ólíklegt að varnir bresti

Sérfræðingum og greinendum þykir mörgum ólíklegt að Rússar muni samþykkja friðaráætlunina. Þeir hafi jafnvel ekki þótt líklegir til að samþykkja upprunalega skjalið, þó það hafi þótt mjög jákvætt fyrir þá.

Það hafi meðal annars verið vegna þess að samkvæmt því yrði úkraínski herinn takmarkaður við sex hundruð þúsund manns. Áður hafa Rússar lagt til að hann yrði takmarkaður við hundrað þúsund menn.

Hingað til hafa Rússar lítið sem ekkert látið af upprunalegum kröfum sínum í garð Úkraínumanna vegna innrásarinnar.

Ráðamenn í Rússlandi, eða í það minnsta Vladimír Pútín, forseti, Rússlands, telja að Rússar séu að sigra Úkraínumenn. Þeir þurfi ekki að láta af kröfum sínum, þar sem Úkraínumenn standi eingöngu frammi fyrir þeim kostum að gefast upp eða vera sigraðir.

Pútín lýsti því yfir í heimsókn til stjórnstöðvar rússneska hersins í síðustu viku að hann væri tiltölulega ánægður með gang stríðsins og að ef Úkraínumenn vildu ekki ræða friðartillögurnar (gömlu) yrðu þeir sigraðir.

Donald Trump, forseti Bandaríkjanna hefur tekið undir þetta sjónarhorn. Hann sagði á föstudaginn að Úkraína myndi tapa restinni af Donbassvæðinu svokallaða á skömmum tíma.

Eitt prósent landsins fyrir 200 þúsund menn

Úkraínski herinn á við mikinn vanda að stríða þegar kemur að manneklu og Rússar hafa verið að sækja fram á þessu ári. Framsókn þeirra hefur þó verið mjög svo hæg og gífurlega kostnaðarsöm.

Í frétt Washington Post segir að á þessu ári hafi Rússar lagt undir sig minna en eitt prósent af úkraínsku landi. Þetta svæði hafi verið hernumið á kostnað þess að fleiri en tvö hundruð þúsund hermenn hafi fallið eða særst í átökunum.

Sérfræðingar sem ræddu við WP segja fátt benda til þess að Rússar séu hársbreidd frá því að brjóta varnir Úkraínumanna, eða baráttuvilja þeirra, á bak aftur.

Pútín er þó sagður til í að halda stríðinu áfram, þrátt fyrir gífurlegan kostnað í mannslífum og peningum, þar sem hann skynjar veikleika í Bandaríkjunum og í Evrópu og mikla þreytu í Úkraínu.