Al­var­leg staða að vera bara með eina skemmda neyslu­vatns­lögn

„Þetta er auðvitað alvarlegt ástand af því að við erum bara með eina neysluvatnslögn,“ segir Íris sem bendir þó á að sem betur fer hafi Vestmanneyingar aðgang að vatni.

Skemmdirnar urðu þegar akkeri Hugins VE festist í lögninni síðastliðið föstudagskvöld.

Rætt verður um ástandið á Almannavarnanefndarfundi, með HS veitum sem reka lögnina, síðdegis í dag. Þar verður meðal annars til skoðunar hvort að þörf sé á erlendu viðgerðarskipi til þess að gera við lögnina.

„Þar tökum við ákvörðun um næstu skref og hvernig tímaplanið verður.“

Talið er að skemmdirnar, sem eru á fimmtíu metra kafla, séu þannig staðsettar, inni í innsiglingunni, að það eigi að vera hægt að gera við þær. Að sögn Írisar mun það þó skýrast betur seinna í dag.

Aðspurð um hvort hún óttist frekari skemmdir á lögninni segir Íris svo ekki vera. „Staðan er bara þannig núna, og við horfum ekki á neina aðra mynd nema að leiðslan haldi. En það er nauðsynlegt að gera við þetta fyrir veturinn.“

„Það er bara ein lögn, og það er ástæðan fyrir því að við höfum bent á mikilvægi þess að lögð verði önnur vatnslögn.“