„Verðum að hafa hug­rekki til að stoppa þegar við erum komin út í al­gjöran skurð.“

Rétt fyrir lokun á föstudag sendi sýslumaðurinn á Vesturlandi Katrínu Oddsdóttur, lögmanni framleiðslufyrirtækisins True North, kröfu þeirra um lögbann á hvalveiði til baka og það tiltekið að skilyrði til lögbanns væru ekki uppfyllt en að þau hefðu tækifæri til að rökstyðja kröfuna betur.

Sjá nánar: True North krefst lögbanns á hvalveiðar Kristjáns

„Þannig að þetta er kannski bara eitthvað sem við þurfum þá annað hvort rökstyðja enn betur til að gera það skýrara eða kannski horfast í augu við þá staðreynd að það er nú erfitt að fá niðurstöðu hjá íslenskum stjórnvöldum þegar það kemur að ýmsu sem tengist náttúruvernd og öðru og kannski er skilningsleysi að einhverju leyti það sem einkennir okkar stjórnvöld og núna hef ég miklar áhyggjur - hvað þessi stóru mál varðar - að fólk sé ekki að grípa alvöruna og í raun og veru hversu miklir hagsmunir raunverulega eru undir fyrir okkar framleiðslufyrirtæki.“ 

Undirskriftalisti gengur um netheima þar sem fjölmargir leikarar, leikstjórar, höfundar, framleiðendur og áhrifafólk í kvikmyndaiðnaði á alþjóðavísu fullyrða að ef Hvalur hf. hefði veiðar á langreyðum að nýju muni þeir ekki lengur koma með verkefni sín til Íslands. 

Fréttastofa ræddi við Leif Dagfinnsson, stofnanda True North í morgun og var hljóðið í honum þungt vegna stöðunnar. Hann sagðist hafa verulegar áhyggjur af þróun mála og að mikil alvara væri á bakvið yfirlýsingar stórstjarna og áhrifafólks í Hollywood um hvalveiðar á Íslandi. Hann óttist hreinlega sniðgöngu. Katrín tekur undir þetta og segir að það hefði grafalvarlegar afleiðingar að lenda á svörtum lista innan kvikmyndaiðnaðarins.

„Fólkið sem er á þessum undirskriftarlista þetta eru ekki bara einhverjar stórstjörnur hvað varðar leikara og annað heldur er þetta fólk sem hefur rosalega mikið um það að segja hvernig fjármagni er dreift og í hvað fjármagn er sett og við hvað það leggur nafn sitt við þannig að margföldunaráhrifin sem þetta getur haft ef af verður eru gríðarleg og ég heyri það að þessum nöfnum er að fjölga.“

Fólk þurfi að átta sig á þeim hagsmunum sem séu í húfi og horfa á stóru myndina.

„Það kom fram í yfirlýsingu sem Samband íslenskra kvikmyndaframleiðenda sendi frá sér fyrir helgi að þarna héngu milljarðar á spýtunni, bara í fyrra var tveir og hálfur milljarður sem þessi bransi velti, og mjög mikið af útflutningstekjum. Við getum síðan borið þetta saman við hvalveiðar ef við viljum leggjast yfir þá grimmu mynd sem þessi samanburður er og séð að þarna eru í rauninni engar útflutningstekjur, varla hægt að koma þessu kjöti á markað og ofboðslega mikil andstaða og hvernig sem á þetta mál er litið þá er þetta algjör rökleysa að vera að stunda veiðar á langreyðum árið 2023 og við verðum að hafa hugrekki til þess að stoppa þegar við erum komin út í algjöran skurð.“