Kírópraktorinn Guðmundur Birkir Pálmason, eða Gummi Kíró, áhrifavaldurinn Lína Birgitta Sigurðardóttir trúlofuðust í París í dag.
Frá þessu greinir Gummi Kíró á Instagram þar sem hann sést fara á skeljarnar við Tuileries Garden í París. Lína Birgitta birtir einnig mynd á Instagram þar sem hún kveðst að sjálfsögðu hafa sagt já.
„Þetta kom mér mikið á óvart og ég hélt að hann væri að grínast til að byrja með. En svo var ekki og að sjálfsögðu sagði ég já,“ segir Lína Birgitta.
Parið heimsótti tískuvikuna í París en fatamerki Línu Birgittu, Define the Line Sport, var sýnt á tískuvikunni í síðustu viku.
Kírópraktorinn Guðmundur Birkir Pálmason eða Gummi Kíró kannast eflaust margir við. Sindri Sindrason leit við hjá Gumma á dögunum fyrir Ísland í dag og fékk að líta inn í fataskápana hans, en Gummi er þekktur fyrir smekklegan fatasmekk og kosta flíkurnar sitt.
Tískuvörumerkið Define the Line í eigu Línu Birgittu Sigurðardóttur fékk boð um að taka þátt í tískuvikunni í París. „Ég fékk boð um að taka þátt í PFW fyrir nokkrum mánuðum en það var fyrirtæki í New York sem hafði samband við mig eftir að hafa fylgst með vörumerkinu,“ segir Lína í samtali við Vísi.
