Fótbolti

Þrettán dagar í EM: Lærði einna mest af bróður sínum en Eto'o á­trúnaðar­goðið

Sindri Sverrisson skrifar
Svava Rós Guðmundsdóttir skoraði gegn Tékkum í sigrinum mikilvæga í undankeppni HM á Laugardalsvelli í fyrra.
Svava Rós Guðmundsdóttir skoraði gegn Tékkum í sigrinum mikilvæga í undankeppni HM á Laugardalsvelli í fyrra. vísir/hulda margrét

Vísir telur niður í Evrópumót kvenna í fótbolta sem fram fer í Englandi í júlí og kynnir leikmenn íslenska landsliðsins. Hin eldfljóta Svava Rós Guðmundsdóttir er næst í röðinni.

Svava er 26 ára sóknarmaður sem sló í gegn á sínu fyrsta tímabili í atvinnumennsku þegar hún skoraði 14 mörk fyrir Röa í norsku úrvalsdeildinni, árið 2018.

Svava fór á sínar fyrstu æfingar í Fram en skipti yfir í Val þar sem hún hóf meistaraflokksferilinn. Hún lék einnig með Breiðabliki hér á landi og varð til að mynda Íslandsmeistari með liðinu 2015 og bikarmeistari 2016.

Áður en hún kvaddi íslensku deildinni gat Svava sér gott orð sem sókndjarfur kantmaður en hjá Röa færðist hún yfir í stöðu sóknarmanns og raðaði inn mörkum.

Elísabet Gunnarsdóttir fékk Svövu svo til Kristianstad í Svíþjóð þar sem hún átti tvö góð ár en þaðan lá leiðin til Bordeaux í ársbyrjun 2021. Dvölin í Frakklandi reyndist hálfgerð martröð eftir að nýr þjálfari tók við liðinu en sá ákvað að hafa Svövu í hálfgerðri frystikistu sem hún losnaði loks úr í byrjun þessa árs þegar hún sneri aftur til Noregs í meistaralið Brann. Þar hefur hún skorað fjögur mörk í fyrstu 12 leikjum sínum.

Svava er á leið á sitt fyrsta stórmót en hún hlaut ekki náð fyrir augum Freys Alexanderssonar þegar valið var í EM-hópinn 2017. Hún hefur komið inn á sem varamaður í flestum af 35 landsleikjum sínum, frá því að hún spilaði sinn fyrsta gegn Norður-Makedóníu árið 2015, og skorað tvö mörk.

Svava Rós Guðmundsdóttir á ferðinni í leik gegn Hollandi í undankeppni HM. Hún hefur leikið 35 landsleiki.Getty/Andre Weening

Fyrsti meistaraflokksleikur? 15 ára með Val í Pepsi-deildinni

Hver hefur kennt þér mest í fótbolta? Líklegast bróðir minn [Guðjón Hrafn] og Steini [Þorsteinn Halldórsson].

Lag sem kemur þér í gírinn fyrir leik? Flest með Herra hnetusmjöri eða gott country.

Mætir einhver af fjölskyldu/vinum til að styðja þig á EM? Já allir að koma til Englands, mjög þakklát fyrir stuðninginn frá fjölskyldunni.

Hvaða námi eða vinnu hefur þú sinnt (fyrir utan fótbolta)? Næringarfræði og nokkur námskeið í innanhús arkitektúr.

Í hvernig skóm spilarðu? Puma future.

Uppáhalds lið í enska? Manchester United.

Uppáhalds tölvuleikur? NBA 2k eða Madden eru ofarlega. Það er allavega það sem spilað er mest heima hjá mér.

Uppáhalds matur? Lasagne og tiramisu í eftirrétt. Skothelt combo.

Fyndnust í landsliðinu? Allavega ekki Sveindís.

Gáfuðust í landsliðinu? Guðrún Arnars.

Óstundvísust í landsliðinu? Miðað við seinustu viku þá Sveindís.

Hvaða lið vinnur EM (ef ekki Ísland)? Frakkland eða England eru sterk.

Hvað er skemmtilegast að gera milli æfinga og leikja í landsliðsferðum? Kíkja í bæjarrölt, skoða sig um og setjast á kaffihús. Eða bara slaka á uppi á hóteli.

Besti andstæðingur/leiðinlegasti andstæðingur? Vanessa Gilles skemmtilegust utan vallar en leiðinlegasti andstæðingurinn.

Átrúnaðargoð í æsku? Samuel Eto’o.

Nefndu eina staðreynd um þig sem fáir vita: Ég spilaði á þverflautu í nokkur ár.




Fleiri fréttir

Sjá meira


×