Innlent

Ferðamennirnir á leið af Vatnajökli til Reykjavíkur

Hallgerður Kolbrún E. Jónsdóttir og Samúel Karl Ólason skrifa
Mynd af undirbúningi fyrir björgunarleiðangurinn á Vatnajökul í kvöld.
Mynd af undirbúningi fyrir björgunarleiðangurinn á Vatnajökul í kvöld. Landhelgisgæslan/Guðmundur Örn Magnússon

Ferðamennirnir sem leitað var að á Sylgjujökli í vestanverðum Vatnajökli eru komnir um borð í þyrlu Landhelgisgæslunnar heilir á húfi. Hjálparbeiðni barst frá fólkinu um miðjan dag, það hafði fallið í vatn og blotnað og var orðið mjög kalt. 

Þyrla Gæslunnar var kölluð út í dag ásamt björgunarsveitum til að koma fólkinu til aðstoðar. Aðstæður á jöklinum voru slæmar, veður á svæðinu var afar slæmt og skyggni lélegt þegar þyrlan gerði tilraun til að finna fólkið fyrr í kvöld. 

Það var björgunarsveitarfólk á snjósleðum og björgunarsveitarbíl sem kom að fólkinu laust eftir klukkan tíu í kvöld og hlúðu að þeim þar sem til þyrlan kom á svæðið og flutti fólkið heim. Fólkið hafði grafið sig í fönn á meðan það beið eftir aðstoð. 

Fram kemur í tilkynningu frá Landhelgisgæslunni að eldsneytistankar þyrlunnar hafi verið fylltir í Reykjavík og undanfarar frá Landsbjörg fengnir til að fara með þyrlunni frá Reykjavík þegar veður varð betra. Þá hafi fjöldi björgunarsveitarmanna verið kallaður út til að leita fólksins við krefjandi aðstæður á jöklinum og leitin hafi borið árangur á ellefta tímanum í kvöld. 

Björgunarsveitarmenn undirbjuggu lendingarstað fyrir þyrluna sem lenti á vettvangi þegar klukkuna vantaði tíu mínútur í ellefu. Fólkið veðrur nú flutt til Reykjavíkur með þyrlunni til aðhlynningar. 

Uppfært klukkan 23:30.

Björgunarsveitir Landhelgisgæslan Vatnajökulsþjóðgarður
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið