Bleyta „heilu bækurnar“ í spice til að koma þeim inn

Frá þessu er greint í Fréttablaðinu í dag en um er að ræða aðferð sem hefur löngum verið notuð til að smygla LSD.

„Við höfum gert upptækar skýrslur sem fangar fá sendar og við efnagreiningu kemur í ljós að hvert einasta blað er bleytt í spice,“ er haft eftir Jóni Þóri Kvaran, meðferðarfulltrúa á Litla-Hrauni. „Stundum heilu bækurnar,“ bætir hann við.

Jón Þór segir neyslu í fangelsum ganga út á notkun efna sem erfitt sé að finna. Sumir sem sitja inni verði virkir þátttakendur í dreifingu efna þegar þeir losna. Hann segir fólk skiptast í tvo hópa þegar kemur að spice; sumir prófi og þyki ekki mikið varið í efnið en aðrir verði „helsjúkir“ í það.

„Fyrir þá einstaklinga sem raunverulega vilja komast frá þessu höfum við oft þurft að aðskilja þá frá fangahópnum, til dæmis koma þeim í annað hús í afeitrun áður en þeir geta farið á meðferðargang.“