Tuskubeljan Cowie varð eftir á tjaldsvæði í Vík í Mýrdal þegar Hattie var á íslandsferðalagi ásamt fjölskyldu sinni. Eðli málsins samkvæmt var Hattie með böggum hildar yfir aðskilnaðinum en sökum þéttrar dagskrár gat fjölskyldan ekki nálgast Cowie.

Fjölskyldufaðirinn lagði mikið á sig í viðleitni sinni til að endurheimta Cowie en allar tilraunir hans til að sameina Hattie og Cowie mistókust. Hann fór meira að segja svo langt að ráða sendil til að sækja Cowie. Sá lét reyndar aldrei sjá sig.

Nokkrir mánuðir eru síðan Cowie gleymdist í Vík en þegar Hattie var í uppnámi þegar kom að háttatíma síðasta mánudagskvöld ákvað Richard að gera eina lokatilraun.

Hann reyndi á mátt samfélagsmiðla og setti færslu á Facebook-síðuna Travel Iceland. Hann segist ekki hafa búist við miklu en að strax daginn eftir hafi mikill fjöldi fólks boðið honum aðstoð.

Óðinn Yngvason ferjaði Cowie frá Vík til Reykjavíkur þar sem Halldór Ingvason tók við henni og veitti henni fylgd til London.

Við tók viðburðarík flugferð þar sem áhöfn flugvélar Play tók vel á móti Cowie. Til að mynda fékk hún að líta inn í flugstjórnarklefann.

Þremur dögum eftir að Richard auglýsti eftir Cowie fékk hann hana afhenta á öldurhúsi í London. Hattie dóttir hans var hin glaðasta þegar hún vaknaði daginn eftir með Cowie sér við hlið.

Richard segir málið skína jákvæðu ljósi á það hvernig samfélagsmiðlar geti tengt fólk um allan heim saman. Hann kann öllum á Travel Iceland hópnum, og sér í lagi þeim Óðni og Halldóri, bestu þakkir fyrir og lofar að heimsækja Ísland aftur í bráð.