Innlent

Bubbi segist niðurbrotinn enda traustið horfið

Jakob Bjarnar skrifar
Bubba Morthens er ekki skemmt. Hann er yfir sig hneykslaður og í raun niðurbrotinn maður vegna kosningaklúðursins.
Bubba Morthens er ekki skemmt. Hann er yfir sig hneykslaður og í raun niðurbrotinn maður vegna kosningaklúðursins. vísir/vilhelm

Bubbi Morthens tónlistarmaður, sá sem sagður hefur verið í hvað bestum tengslum allra við sjálfa þjóðarsálina með verkum sínum, hefur sent frá sér yfirlýsingu þar sem hann segist ekki lengur treysta kosningakerfinu á Íslandi.

„Traustið er horfið,“ segir Bubbi. Honum var mikið niðri fyrir þegar blaðamaður Vísis ræddi við hann um talningarklúðrið sem skekið hefur þjóðina í gærkvöldi og í dag. Bubbi sagðist vart eiga til orð í eigu sinni um þennan gjörning allan.

„Þetta er orðið algjört … aumingjaþjóðfélag. Ég hef trúað ýmsu upp á Íslendinga en ég hefði ekki trúað því að óreyndu uppá okkur að við gætum ekki haldið kosningar í þessu samfélagi. Ég verð að segja það. Ég er niðurbrotinn.“

„Ég er eiginlega orðlaus“

Bubbi segist í gegnum tíðina hafa upplifað eitt og annað og orðið vitni að ýmsu; tali um spillingu, samtryggingu, einkavinavæðingu og allt það. „En ég hefði aldrei trúað að þetta myndi raungerast með þessum hætti. Hélt að kosningarnar væru eitthvað sem mætti treysta.“

Tónlistarmaðurinn lýsir því forviða að einhverjir menn stígi fram og lýsi því yfir að þeir séu jú klárlega að brjóta lög, en það hafi þeir alltaf gert og fyrir því væri komin hefð.

„Hvar annars staðar í hinum siðmenntaða heimi nema á Íslandi kæmi svona fram og það er ekki einn þungavigtarmaður í íslenskri pólitík þannig séð sem stígur fram og segir: Þetta er ekki boðlegt. Það þarf að kjósa aftur og ég er búinn að missa trúna á hvernig við stöndum að kosningum. Ég á ekki orð, þó að ég sé með eitthvað gaspur. Ég er eiginlega orðlaus.“

Hvar eru formenn stjórnarflokkanna?

Og Bubba rekur hreinlega í vörðurnar sem ekki gerist oft. Hann segist sannarlega ekki einn um að vera ofboðið og þetta sama myndi John Lennon segja ef hann væri á lífi.

„Þetta er algjörlega fáránlegt, þetta fyrirkomulag sem við búum við hér á landi,“ segir Bubbi sem lýsir því að hann hafi ekki fattað í fyrstu hversu alvarlegt málið var. Svo yfirgengilegt sé þetta. Hann telur einsýnt að það þurfi að skera allt fyrirkomulagið upp. Sjálfur vill hann tala fyrir persónukjöri. Þá segir hann að mismunandi vægi atkvæða, til dæmis, sé í raun rót spillingar. Með ólíkindum að það skuli líðast.

„Að það skuli viðgangast á tímum snjallsíma er gjörsamlega galið. Og ef einhvern tíma þetta hefur komið átakanlega í ljós þá er það í þessum kosningum. En að einhver maður telji sig þess umkominn að hefja endurtalningu upp á eigin spýtur án þess að ræða við nokkurn þann sem telur sér málið skylt, og telji sig ekki þurfa að fara að lögum?!“ segir Bubbi og er búinn að finna orð sín aftur:

„Og enginn stígur fram nema gamli karatemeistarinn Karl Gauti Hjartason sem kærir! Að formenn flokkanna hafi ekki stigið fram og sagt, þetta er ekki í lagi, það slær mig illa. Þá fer maður að hugsa: Eru þau bara kampakát og glöð með þetta? Af því að það hentar í það skiptið?“


Tengdar fréttir

Karl Gauti ætlar að kæra framkvæmd kosninga til lögreglu

Karl Gauti Hjaltason, fráfarandi þingmaður Miðflokksins, er í þessum skrifuðu orðum að vinna að kæru til lögreglu. Krafa hans er skýr, að upplýst verði um atvik í Norðvesturkjördæmi þar sem ráðist var í endurtalningu. 

Fullyrðir að traust á niðurstöðum kosninga sé horfið

Katrín Oddsdóttir, lögfræðingur og formaður stjórnarskrárfélagsins, segir að traust á kosningum til löggjafarþingsins sé horfið. Hún hefur Jón Þór Ólafsson fyrrverandi þingmann fyrir því að innsigli á kjörkössum séu ítrekað rofin.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.