Fótbolti

Erlendir miðlar fjalla um mál KSÍ: „Skandall skekur Ísland“

Valur Páll Eiríksson skrifar
Mál KSÍ hefur vakið athygli víða.
Mál KSÍ hefur vakið athygli víða.

Fjölmargir erlendir fjölmiðlar hafa greint frá afsögn Guðna Bergssonar, fráfarandi formanns Knattspyrnusambands Íslands, sem og ofbeldisbroti landsliðsmannsins Kolbeins Sigþórssonar bæði í dag og í kvöld.

Greint var frá því fyrr í dag að rúmenskir miðlar hefðu tekið málið fyrir en Rúmenía er einn andstæðinga karlalandsliðs Íslands í undankeppni HM 2022 í komandi landsliðsverkefni.

Stjórn KSÍ ákvað að víkja vegna málsins í kvöld og boðaði til aukaþings sambandsins eftir fjórar vikur. Þau nýjustu tíðindi hafa líklega ekki enn náð út, ef litið er yfir erlenda fjölmiðla.

Málið hefur hins vegar vakið mikla athygli utan landssteinanna og segja Berlingske Tidende frá Danmörku að „stór skandall skeki Ísland“ í upphafi fréttar miðilsins um málið. Þar er greint frá frásögn Þórhildar Gyðu Arnarsdóttur á RÚV á föstudag og að Guðni hafi tekið fyrir að sambandinu hafi borist tilkynningar um kynferðisofbeldi deginum áður, á fimmtudag. Tónn KSÍ hafi breyst á sunnudag þar sem þolendur ofbeldis voru beðnir afsökunar og Guðni síðan sagt af sér vegna málsins.

Í frétt danska miðilsins segir að ekki hafi verið gefið opinberlega út af sambandinu hver leikmaðurinn sem framdi brotið sé en að KSÍ hafi ákveðið að taka Kolbein Sigþórsson úr leikmannahópnum fyrir komandi leiki í gær.

Fengu litlar upplýsingar frá upplýsingafulltrúa

Expressen frá Svíþjóð tók málið upp í kvöld í kjölfar þess að sænska fótboltaliðið Gautaborg greindi frá því að leikmaður liðsins hefði brotið af sér árið 2017 og að málið væri til skoðunar hjá félaginu. Leikmaðurinn sem um ræðir er Kolbeinn Sigþórsson og Expressen greinir frá því að hann hafi verið tekinn úr íslenska landsliðshópnum að beiðni Knattspyrnusambandsins.

Expressen hefur þá eftir Ómari Smárasyni, upplýsingafulltrúa KSÍ: Það var stjórn sambandsins sem ákvað að Kolbeinn væri ekki með landsliðinu. Það er erfitt fyrir mig að tjá mig frekar þar sem ég tala ekki fyrir hönd stjórnarinnar.

Franski miðillinn L'Equipé fjallar einnig um málið er greint er frá því að Guðni Bergsson hafi sagt af sér vegna skandals tengdan kynferðisbroti leikmanns íslenska landsliðsins. Þar er haft eftir íslenskum fjölmiðlum að sá leikmaður sé Kolbeinn Sigþórsson, og tekið fram að hann sé fyrrum leikmaður Nantes í Frakklandi.

Á meðal annarra miðla sem fjalla um málið er maltneski miðillinn Times of Malta, Abuja City News frá Nígeríu, mexíkóski miðillinn Reforma, sportmiðillinn Sportowe Fakty frá Póllandi, ekvadorski fótboltamiðillinn Cancha og svo mætti lengi telja.


Tengdar fréttir

Stjórn KSÍ segir af sér

Stjórn Knattspyrnusambands Íslands, varafulltrúar hennar og landshlutafulltrúar hafa ákveðið að segja af sér. Þetta kemur fram í tilkynningu frá sambandinu. Boðað verður til aukaþings hjá sambandinu með fjögurra vikna fyrirvara.

Klara Bjartmarz ætlar að halda áfram

Klara Bjartmarz hyggst halda áfram sem framkvæmdastjóri KSÍ eftir að ný stjórn sambandsins tekur við. Stjórn KSÍ hefur tilkynnt að hún ætli að stíga til hliðar í kjölfar umfjöllunar um viðbrögð sambandsins við ásökunum um ofbeldi af hendi landsliðsmanna. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.