Lífið

Innipúkinn snýr aftur á nýjum stað

Kolbeinn Tumi Daðason skrifar
Birgitta Haukdal er þekktust fyrir söng sinn með hljómsveitinni Írafár. 
Birgitta Haukdal er þekktust fyrir söng sinn með hljómsveitinni Írafár.  Vísir/Vilhelm

Tónlistarhátíðin Innipúkinn fer fram í Ingólfsstræti í Reykjavík um verslunarmannahelgina eftir að hafa verið blásin af í fyrra vegna kórónuveirufaraldursins. Þá stóð til að Birgitta Haukdal og Moses Hightower kæmu fram saman. Ári síðar verður sameiningin að veruleika.

Margir vinsælustu tónlistarmenn landsins koma fram á hátíðinni í ár og má þar nefna Bjartar sveiflur, Bríet, Emmsjé Gauti, Eyþór Ingi, Floni, GDRN, gugusar, Hipsumaps, Mammút, Reykjavíkudrætur og Teitur Magnússon. Birgitta og Moses Hightower koma fram á opnunarkvöldinu.

Forsvarsmenn Innipúkans segjast afar stoltir af fjöbreyttri dagskrá Innipúkans í ár og full bjartsýni á að það takist að halda hátíðina með pompi og prakt. Hætta þurfti við hátíðina með eins dags fyrirvara í fyrra vegna Covid.

Innipúkinn færir sig af Grandanum, þar sem hátíðin hefur verið haldin síðustu ár, og yfir á Ingólfsstræti. Aðaltónleikadagskráin fer fram innandyra, í Gamla bíó og efri hæð Röntgen. 

Á svæðinu verður sannkölluð hátíðarstemning alla helgina enda verður nóg um að vera á götunni fyrir utan staðina sem og inni á stöðunum sjálfum. Boðið verður upp á fjölbreytta tónleikadagskrá föstudags-, laugardags- og sunnudagskvöld, 30. júlí-1. ágúst.

Á útisvæðinu má gera má ráð fyrir gamalreyndum púka-dagskrárliðum á borð við árlegum lista- og fatamarkaði, ásamt plötusnúðum og veitingasölu.

Miðasala á hátíðina er hafin og fer fram á tix.is. Armband á hátíðina gildir alla helgina. Einnig verður hægt að kaupa miða á stök kvöld hátíðarinnar og fara þeir miðar í sölu fljótlega.

„Síðustu ár hefur verið uppselt á Innipúkann - og því um að gera tryggja sér miða í tíma,“ segir í tilkynningunni.

Miðaverð

- 3-ja daga hátíðarpassi: 8.990 kr.

- Miði á stakt tónleikakvöld: 4.990 kr.

Listamenn

• Allenheimer

• Birgitta Haukdal & Moses Hightower

• Bjartar sveiflur

• Bríet

• Emmsjé Gauti

• Eyþór Ingi

• Floni

• GDRN

• gugusar

• Hipsumhaps

• Inspector Spacetime

• krassasig

• Mammút

• Reykjavíkurdætur

• Skoffín

• Teitur Magnússon

• Une Misére


Tengdar fréttir






Fleiri fréttir

Sjá meira


×