Innlent

Reglu­legar eftir­lits­ferðir vegna eld­hættu víða um land

Vésteinn Örn Pétursson skrifar
Slökkviliðið við störf þegar eldur kom upp í Guðmundarlundi í Kópavogi í gær.
Slökkviliðið við störf þegar eldur kom upp í Guðmundarlundi í Kópavogi í gær. Vísir/Vilhelm

Lögregla og slökkvilið á þeim svæðum þar sem almannavarnastigi vegna hættu á gróðureldum hefur verið lýst yfir hafa aukið viðbúnað sinn og eftirlit vegna þess hve hættan á gróðureldum er nú mikil. Svæðið sem um ræðir nær allt frá Eyjafjöllum í austri og vestur að Breiðafirði.

Þetta kom fram í máli Rögnvalds Ólafssonar, aðstoðaryfirlögregluþjóns hjá Almannavörnum, í Reykjavík síðdegis á Bylgjunni í dag.

„Við erum búin að lýsa yfir almannavarnastigi og viðbragðsaðilar eru í startholunum. Það er búið að setja á vaktir sums staðar þar sem alla jafna eru ekki vaktir, færa til ýmis tæki og tól svo þau séu nær og auðveldara að grípa til þeirra ef á þarf að halda, lögregla er búin að bæta við eftirlitsferðir um þessi svæði og auk þess er slökkvilið farið að fara í eftirlitsferðir um þessi svæði. Þannig það er ýmislegt verið að gera,“ segir Rögnvaldur.

Hann segir það einsdæmi að jafn víða sé hættan á gróðureldum svona mikil hér á landi og að margir slökkviliðsstjórar hafi lagt blátt bann við meðferð á opnum eldi innan sinna umdæma.

Hann telur þá að þó almenningur taki tilmælunum vel og fylgi þeim að mestu virðist fólk ekki átta sig alveg á hættunni sem getur skapast við lítið tilefni. Lítill neisti, til dæmis út frá vinnuvélum, geti leitt til mikils báls.

„Þetta er oft bara lítil viðhaldsvinna sem er verið að sinna, sem fólk gerir dagsdaglega og hefur gert hundrað sinnum áður. Núna er gróðurinn bara svo skrælþurr að hann tekur rosalega vel við svona neistum og stækkar þá hratt.“

Hringja fyrst í 112

Rögnvaldur segir að fólk verði að reyna að koma í veg fyrir að gróðureldar kvikni, með öllum ráðum.

„Það eru mjög góðar upplýsingar inni á gróðureldar.is um hvað er hægt að gera, eins og til dæmis í kringum sumarhúsin. Eitt af því sem bent er á er að vera með góða slöngu, helst að hún nái tvo hringi í kring um húsið, og bleyta í gróðrinum sem er þar við.“

Hann segir þá að gott geti verið að grynnka á gróðrinum, en helst eigi að nota handverkfæri í stað bensínknúinna tækja. Slík tæki geti skapað eldhættu. Þá er mikilvægt að vita hvernig bregðast eigi við ef eldur kemur upp.

„Fyrsta er að hringja í 112 og láta vita, og svo vara fólk sem er í grennd við svo fólk hafi tækifæri til að forða sér. Svona hlutir geta gerst mjög hratt. Að sjálfsögðu að reyna að slökkva eldinn ef fólk hefur tök á því, annars bara að reyna að forða sér.“


Tengdar fréttir

Slökkviliðið sinnir útkalli við Hvaleyrarvatn

Slökkviliðið á höfuðborgarsvæðinu sinnir útkalli við Hvaleyrarvatn í Hafnarfirði þar sem logar gróðureldur. Þetta segir varðstjóri hjá slökkviliðinu í stuttu samtali við Vísi.

Brennheitt gjallið kveikir gróðurelda fjarri gígnum

Glóandi gjall, sem þeytist hátt til himins úr eldgígnum á Fagradalsfjalli, hefur náð að kveikja gróðurelda í yfir eins kílómetra fjarlægð og var gossvæðið af þeim sökum lokað í dag. Kapp er nú lagt á bæta göngustíginn vegna tíðra slysa, með tveimur til þremur ökklabrotum á dag.

Heiðmörk opin en reykingar bannaðar

Göngustígar og akvegir í Heiðmörk eru opnir gestum þrátt fyrir gróðureldinn sem geisaði á þriðjudaginn. Reykingar og hvers kyns meðferð elds eða eldfæra er bönnuð í Heiðmörk á meðan veður er jafn þurrt og nú er. Gestir friðlandsins eru hvattir hugsa vel um náttúruna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×