Grunsamlegar mannaferðir og eldur í runna

Hólmfríður Gísladóttir skrifar 7. maí 2021 06:25

Að vanda stöðvaði lögregla nokkra ökumenn sem grunaðir eru um akstur undir áhrifum. Vísir/Vilhelm

Lögreglan á höfuðborgarsvæðinu sinnti nokkuð fjölbreyttum verkefnum í gærkvöldi og nótt og var meðal annars kölluð til vegna grunsamlegra mannaferða og elds í runna. Þá var tilkynnt um nokkur innbrot og umferðaróhöpp.

Lögreglu bárust alls þrjár tilkynningar um innbrot; eitt í Vesturbæ, eitt í Austurbæ og eitt í fyrirtæki í umdæmi 2, það er Hafnarfirði, Garðabæ eða Álftanesi. Öll málin eru í rannsókn.

Þá bárust tvær tilkynningar um ölvaða menn sem voru til vandræða. Einn var að ráfa um miðborgina og sinnti þeim fyrirmælum að koma sér heim en hinn veittist að sjúkraflutningamönnum þegar þeir hugðust koma honum til aðstoðar.

Sá var orðinn rólegur þegar lögreglu bar að og þáði hjálpina.

Lögregla var einnig kölluð til vegna elds í runna en þegar á staðinn var komið var íbúi að ljúka slökkvistörfum.

Fimm tilkynningar bárust vegna umferðaróhappa. Ein vegna manns sem datt af rafskútu en sá reyndist ölvaður. Var hann ekki slasaður og vildi ekki aðstoð lögreglu. Þá lentu bifreið og bifhjól saman en meiðsli voru minniháttar.

Tvö umferðaróhappana reyndust minniháttar og voru leyst án aðkomu lögreglu. Fimmta tilkynningin varðaði vörubifreið sem hafði ekið utan í ljósastaur. Ökumaðurinn lét sig hverfa en fannst skömmu síðar.

Í umdæmi 2 var einnig tilkynnt um grunsamlegar mannaferðir, þar sem einstaklingur virtist ganga um og lýsa inn í bifreiðar en maðurinn var farinn þegar lögreglu bar að garði.

Lögreglumál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.