Innlent

Margt annað að gera en að nýta lagalega smugu til að keyra á göngugötum

Snorri Másson og Kjartan Kjartansson skrifa
Nokkrar bílar voru á ferðinni á þeim hluta Laugavegar sem hefur verið göngugata þegar ljósmyndari Vísis var þar á ferð mánudagin 3. maí 2021.
Nokkrar bílar voru á ferðinni á þeim hluta Laugavegar sem hefur verið göngugata þegar ljósmyndari Vísis var þar á ferð mánudagin 3. maí 2021. Vísir/Vilhelm

Heimilt hefur verið samkvæmt lögum að keyra niður Laugaveginn á milli Frakkarstígs og Klapparstígs frá upphafi mánaðarins, eftir að tímabundin heimild til göngugötufyrirkomulags á umræddum kafla féll úr gildi. Þá heimild á að endurnýja á morgun.

Vegna þess að lögformlega var kaflinn ekki lengur göngugata í þessa fjóra daga, hefur Vigdís Hauksdóttir, borgarfulltrúi Miðflokksins, vakið reglulega athygli á því á Facebook að Laugavegurinn sé „opinn fyrir bílaumferð“ eins og þar segir.

Pawel Bartoszek, forseti borgarstjórnar og fulltrúi Viðreisnar, segir í samtali við Vísi að hann telji ekki skynsamlegt að hvetja fólk til þess að keyra um götuna, enda flestir sem hafi vanist því að umræddur kafli sé göngugata.

„Ég tel ekki skynsamlegt að hvetja fólk til að nýta sér þessa hugsanlegu lagalegu óvissu til að keyra á stórum trukkum á malbiki. Ég held að menn geti gert ýmislegt annað við tímann sinn. En í versta falli erum við að horfa á síðustu daga þess að þessi hluti Laugavegar verði opinn fyrir bílaumferð og ég gleðst yfir því,“ segir Pawel.

„Ég alla vega bið fólk, að ef einhver ætlar að taka þátt í einhverjum gjörningi, að keyra niður Laugaveginn, að huga alla vega að varúðarreglum umferðarlaga og sýna hina mestu tillitssemi enda hafa gangandi vegfarendur vanist því að þetta sé göngusvæði í nokkurn tíma,“ bætir Pawel við.

Vigdís Hauksdóttir, í stöðuuppfærslu 30. apríl: „Tilkynning!!! Laugavegurinn verður opinn fyrir bílaumferð frá og með miðnætti í dag og þar til borgarsjórnarfundi líkur [sic] þriðjudaginn 4. maí m.ö.o. Laugavegurinn verður opinn í 4 sólarhringa.“Vísir/Vilhelm

Á morgun verður ný bráðabirgðaheimild fyrir göngugötur að líkindum samþykkt á fundi borgarstjórnar á meðan þess er enn beðið að hin varanlega ráðstöfun verði tilkynnt í Stjórnartíðindum. Pawel segir ástæðu þess að ekki hafi verið sköpuð ný bráðabirgðaheimild í tæka tíð þá, að talið var að auglýsingin yrði birt í Stjórnartíðindum fyrir 1. maí. Það gerðist ekki.

Hringlið þreytandi

Ekki tókst að samþykkja framlengingu á heimildinni áður en hún rann út á fundi skipulagsráðs í síðustu viku þar sem Eyþór Arnalds og Marta Guðjónsdóttir, fulltrúar Sjálfstæðisflokksins, greiddu atkvæði gegn því. Málið var tekið fyrir í borgarráði á fimmtudag sem samþykkti tillöguna með fjórum atkvæðum meirihlutaflokkanna gegn tveimur atkvæðum borgarráðsfulltrúa Sjálfstæðisflokksins. 

Eyþór greiddi aftur atkvæði gegn tillögunni ásamt Valgerði Sigurðardóttur. Hildur Björnsdóttir, flokkssystir þeirra, sat hjá við atkvæðagreiðsluna.

Pawel Bartoszek, forseti borgarstjórnar, gerir ráð fyrir að ný bráðabirgðaheimild fyrir göngugötu á Laugavegi verði samþykkt á morgun. Þangað til ræður hann fólki frá því keyra þar um á bíl.Vísir/Vilhelm

Tillagan fer fyrir borgarstjórn til endanlegrar staðfestingar á morgun. Í millitíðinni er því ekkert sem bannar það að bílum sé ekið þennan hluta Laugavegsins jafnvel þó að þar séu enn umferðarskilti sem segja annað þessa stundina.

Katrín Atladóttir, borgarfulltrúi Sjálfstæðisflokksins og fulltrúi í skipulags- og umhverfisráði borgarinnar, gagnrýnir að meirihlutinn hafi sett tillöguna um að framlengja heimildina svo seint á dagskrá. Hringl með göngugötuna sé þreytandi fyrir bæði rekstraraðila og íbúa.

„Meirihlutinn er búinn að tala um þetta í meira en tíu ár en hann er ekki enn búinn að ná að framkvæma þetta,“ segir hún við Vísi.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×