Innlent

Telur ó­senni­legt að Reyk­víkingar muni finna mikinn mun

Kristín Ólafsdóttir skrifar

Formaður Félags íslenskra bifreiðaeigenda segir boðaða lækkun hámarkshraða á götum í eigu borgarinnar mikla afturför sem lengja muni ferðatíma Reykvíkinga. Samgönguverkfræðingur telur hins vegar að áhrif á ferðatíma verði hverfandi.

Breytingarnar voru samþykktar í umhverfis- og skipulagsráði í gær. Stærsta breytingin verður á stofnbrautum eins og Suðurlandsbraut þar sem hámarkshraði fer úr 60 í 40 kílómetra á klukkustund. Á götum eins og Háaleitisbraut, Grensásvegi, Bústaðavegi, Snorrabraut og Suðurgötu lækkar hann úr 50 í 40 kílómetra á klukkustund.

Runólfur Ólafsson framkvæmdastjóri FÍB, hagsmunasamtaka bifreiðaeigenda, segir að vissulega verði umferðaröryggi bætt með því að lækka svo hámarkshraða niður í þrjátíu í öllum íbúðahverfum.

„En að taka meginstofnæðar niður í 40 eða 50 kílómetra hraða, það teljum við vera mikið skref aftur á bak og hindrun í veg borgaranna.“

Runólfur Ólafsson, framkvæmdastjóri FÍB.vÍSIR/ARNAR

Þetta muni lengja ferðatíma Reykvíkinga og stuðla að umferðartöfum.

„Ef þú til dæmis þarft að fara frá vinnu og sækja þjónustu læknis eða eitthvað annað á vinnutíma, þá þýðir það bara mun lengri ferðatími sem þýðir meiri fjarvera frá vinnu, sem þýðir meiri kostnaður, sem þýðir minni samverustundir hjá fjölskyldum og svo framvegis,“ segir Runólfur.

Á götum eins og Bústaðavegi, Háaleitisbraut, Grensásvegi, Snorrabraut og Suðurgötu lækkar hámarkshraði úr 50 í 40 kílómetra á klukkustund.

Meðalhraðinn sjaldnast hámarkshraðinn

Fram kemur í skýrslu borgarinnar að breytingin muni hafa í för með sér 12 prósent lengingu á ferðatíma. Tafir við gatnamót eru þar ekki teknar með í reikninginn. Bílferð sem nú tekur fimmtán mínútur myndi þannig lengjast um tæpar tvær mínútur.

„Þetta er ekki veruleg lenging,“ segir Lilja Guðríður Karlsdóttir, samgönguverkfræðingur hjá VSB verkfræðistofu. „Ætti ekki að vera það í flestum tilfellum því að meðalhraðinn á bílunum í borginni er sjaldnast 50, 60 kílómetra hraði eins og staðan er í dag.“

Aðrir þættir en hámarkshraði vegi talsvert þyngra.

Lilja Guðríður Karlsdóttir, samgönguverkfræðingur.Vísir/Sigurjón

„Ef ég tek sem dæmi Bústaðaveginn. Frá Reykjanesbraut og upp að Kringlumýrarbraut, þetta er tveir og hálfur kílómetri. Á fimmtíu kílómetra hraða þar í dag ertu svona þrjár mínútur að keyra í frjálsu flæði en það gerist aldrei því það eru sirka sex eða sjö ljós á leiðinni sem þú þarft að stoppa við. Þannig að rauntíminn hjá þér í dag ertu kannski nær sjö mínútum. Þannig að þó svo að hraðinn lækki held ég að fólk finni ekki neinn svakalegan mun hjá sér,“ segir Lilja.

Veltir ekki hversdagsleikanum

„Það er yfirleitt pakkað gatnakerfið í borgum á háannatíma. Ég veit ekki hvort það sé til sú borg í heiminum þar sem þú getur keyrt á hámarkshraða á annatíma. Þannig að það er magnið af bílunum, ljósastýringarnar, gangandi vegfarendur og hjól og allt það sem hefur úrslitaáhrifin.“

Telurðu líklegt að þetta verði breyting sem fólk muni finna fyrir?

„Það er alveg mögulegt á einhverjum leiðum. Ég tók ekki þátt í þessu þannig að ég veit ekki hvaða greiningar liggja þarna á bak við. En ég held að í stóru myndinni verði það ekki neitt sem veltir hversdagsleikanum hjá fólki.“


Tengdar fréttir

Gætu slegið nokkrar flugur í einu höggi með lægri há­marks­hraða

Áform borgaryfirvalda um að lækka hámarkshraða til að útrýma alvarlegum umferðarslysum gæti einnig dregið umtalsvert úr loftmengun. Hagsmunasamtök bíleigenda eru ósátt við áformin en samgönguverkfræðingur segir annað en hámarkshraða ráða meiru um ferðatíma bíla í borginni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.