Innlent

Ísland við háborðið með stórveldunum

Kristján Már Unnarsson skrifar

Norðurskautsráðið er eini vettvangurinn þar sem Íslendingum gefst færi á að vinna náið með helstu stórveldum heims á jafningjagrundvelli. Þetta segir Össur Skarphéðinsson utanríkisráðherra, sem þó var fjarverandi fund ráðsins í Kiruna í Svíþjóð í dag, - hann kaus að sitja heima vegna yfirvofandi stjórnarskipta á Íslandi.

Þoturnar sem lentu á flugvellinum í Kiruna segja sitt um þann þunga sem stórveldin leggja nú í málefni Norðurslóða en bæði Bandaríkin og Rússland sendu utanríkisráðherra sína til fundarins, þá John Kerry og Sergei Lavrov. Helsta verkefni fundarins var einmitt að ákveða hvernig aðkomu önnur stórveldi heims hefðu að Norðurskautsráðinu og varð niðurstaðan sú að ríki eins og Kína, Indland og Japan fengju áheyrnaraðild og hugsanlega Evrópusambandið líka ef það féllist á selveiðar frumbyggja.

Íslendingar sitja hins vegar áfram við háborðið í hópi átta ríkja Norðurskautsráðsins. Áhrif Íslendinga birtast einnig í því að þeir eiga æðsta embættismann Norðurskautsráðsins, Magnús Jóhannesson. Það þótti einnig marka tímamót í Kiruna að samkomulag var undirritað um varnir gegn olíumengun.

Fulltrúar ríkjanna átta. Össur Skarphéðinsson var fjarverandi en Hermann Örn Ingólfsson, sviðsstjóri í utanríkisráðuneytinu, fór í staðinn fyrir sendinefnd Íslands.

Eitt skyggði þó á samstöðuna; Grænlendingar ákváðu að hunsa fundinn til að mótmæla því að þeir sem frumbyggjaþjóð á norðurslóðum hefðu misst beina aðkomu að ráðinu og yrðu að sækja sín mál í gegnum Dani.


Tengdar fréttir

Grænlendingar hunsa fund Norðurskautsráðs

Grænlendingar ætla að hunsa ráðherrafund Norðurskautsráðsins í Kiruna í Svíþjóð á morgun. Þetta gera þeir í mótmælaskyni við að Norðurskautsráðið skuli undir formennsku Svía ekki hafa tryggt Grænlendingum sömu stöðu við samningaborðið eins og Dönum. Það sé í bága við það sem áður tíðkaðist á fundum ráðsins, þegar Grænland fékk eigin fulltrúa í helstu nefndum ráðsins, við hlið fulltrúa Danmerkur, í ljósi þess að Grænland er eina ríkið á Norðurslóðum þar sem frumbyggjar eru í meirihluta íbúa. Ný heimastjórn Grænlands, undir forsæti Alequ Hammond, segist í yfirlýsingu vilja með þessari ákvörðun senda skýr skilaboð um að núverandi staða Grænlands á vettvangi Norðurskautsráðsins sé ekki ásættanleg og verði ekki þoluð. Heimastjórnin segist harma að hafa þurft að taka þessa ákvörðun en hún hafi verið nauðsynleg. Þátttaka í ráðinu sé forgangsmál hjá Grænlendingum. Þar til viðunandi lausn finnist á stöðu Grænlands verði þátttaka þess í ráðinu sett á bið. Átta ríki eiga aðild að Norðurskautsráðinu; Bandaríkin, Danmörk, Finnland, Ísland, Kanada, Noregur, Rússland og Svíþjóð. Fundinn í Kiruna sækja ráðherrar frá öllum aðildarríkjum nema Íslandi, þeirra á meðal John Kerry, utanríkisráðherra Bandaríkjanna, Sergei Lavrov, utanríkisráðherra Rússlands, og Carl Bildt, utanríkisráðherra Svíþjóðar. Össur Skarphéðinsson, utanríkisráðherra Íslands, situr ekki fundinn en í hans stað verður við ráðherraborðið Hermann Örn Ingólfsson, sviðsstjóri alþjóða- og öryggissviðs utanríkisráðuneytis.

Mest lesið


Fleiri fréttir

Sjá meira


×

Mest lesið