Nær blindur maður ætlar í langhlaup með hvíta stafinn

Víða um borgina má sjá skokkara koma sér í form fyrir Reykjavíkurmaraþonið en blaðamenn Fréttablaðsins ráku þó upp stór augu í fyrrakvöld þegar þeir sáu Þórð Pétursson hlaupa meðfram Miklubrautinni en hann er nær blindur og notast því við blindrastaf á skokkinu.

„Ég hleyp hérna frá Lönguhlíð eftir Miklubrautinni og fer síðan upp hjá Suðurveri en þaðan er leiðin svo ógreiðfær heim í Hamrahlíðina að ég geng þann spöl,“ sagði Þórður móður þegar blaðamaður fékk að trufla hann. „Ég fer þetta núna á hverjum degi enda er ég að æfa fyrir Reykjavíkurmaraþonið. Þar ætla ég að hlaupa þrjá kílómetra. Ég er nú að vonast til þess að fá aðstoðarmann með mér í það.“

Hann segist óhræddur við að hlaupa með blindrastafinn og enn hafi hann ekki lent í neinu óhappi. Stafurinn er frábrugðinn öðrum blindrastöfum að því leyti að það er kúla á endanum sem Þórður rennir á undan sér.

Það þarf heldur betur traust á stafinn til að skokka við þessar aðstæður en Þórður sér einungis birtu. „Ég sé þig til dæmis ekki núna,“ sagði hann við blaðamann þegar hann stóð um metra frá honum.

Svava Oddný Ásgeirsdóttir hlaupstjóri segist ekki vita til þess að blindur maður hafi áður tekið þátt í Reykjavíkurmaraþoninu. „Reyndar er það svo að fólk er svo duglegt og lætur nánast ekkert aftra sér svo það gæti verið að einhver blindur hafi hlaupið hjá okkur án þess að við hefðum orðið vör við það,“ segir hún. Hún segir að um ellefu þúsund manns hafi hlaupið í fyrra og allt útlit sé fyrir svipaðan fjölda í ár. Meðal keppenda verða um þúsund erlendir hlauparar frá um fimmtíu þjóðlöndum.

jse@frettabladid.is