Styrkja félagasamtök í stað þess að senda jólakort

Össur Skarphéðinsson iðnaðarráðherra hefur ákveðið að styrkja Faðm, styrktarsjóð samtakanna Heilaheilla, um þá upphæð sem annars hefði farið jólakort með kveðjum ráðherra og starfsfólks ráðuneytisins. Fram kemur í tilkynningu frá iðnaðaráðuneytinu að styrkurinn nemi 400 þúsund krónum og var hann afhentur í dag.

Össur er ekki eini ráðherrann sem þetta gerir því flokkssystir hans, Þórunn Sveinbjarnardóttir umhverfisráðherra, ákvað að styrkja Alnæmisbörn og Alnæmisamtökin um 200 þúsund krónur hvort í stað þess að senda út jólakort frá ráðuneytinu.