Reykvélin: Aftur reykur í sömu flugvél

Flugvél frá Icelandair á leið til Bergen var snúið við í morgun vegna reyklyktar í farþegarými að sögn Guðjóns Arngrímssonar, upplýsingafulltrúa Icelandair.

Flugið hafði staðið í um 20 mínútur þegar flugstjóri tók ákvörðun um að snúa við. Um borð voru 102 farþegar.

Um er að ræða sömu flugvél og reykur kom upp í þann 4. júní síðastliðinn á leið frá París, vegna bilunar í hreyfli. Skipt var um hreyfil ytra eftir atvikið og framkvæmd viðhaldsskoðun á flugvélinni áður en henni var flogið til Íslands.

Flugið í morgun var fyrsta flug vélarinnar með farþega eftir atvikið. Ljóst er að reykjarlyktin í morgun stafaði frá einum af loftþrýstijöfnurum þotunnar, og er afleiðing bilunarinnar þann 4. júní síðastliðinn. Ekki var hætta á ferðum, en farþegar urðu fyrir óþægindum.

Boðið var upp á áfallahjálp við komuna til Keflavíkur, eins og venja er við slíkar aðstæður.

Vélin lenti á heilu og höldnu á Leifsstöð klukkan níu í morgun. Að sögn Guðjóns var ekki mikill viðbúnaður vegna reykjarlyktarinnar.