Mjög mikið hallar á konur í íslenskum kvikmyndahúsum

Kvikmyndir eftir karla eru í miklum meirihluta þeirra kvikmynda sem teknar eru til sýninga á Íslandi. Í rannsókn Kvenréttindafélags Íslands og Stockholms feministiska filmfestival sem náði til allra kvikmynda sem teknar voru til sýningar í íslenskum, dönskum og sænskum kvikmyndahúsum árið 2016 er kynjahlutfallið verst á Íslandi.

93 prósent kvikmynda sem voru teknar til sýninga í íslenskum kvikmyndahúsum árið 2016 var leikstýrt af körlum.

Rannsóknin á Íslandi náði líka til dagskrár RÚV. Hlutfallið var hið sama samkvæmt rannsókninni, 93 prósent kvikmynda sem sýndar voru á RÚV 2016 var leikstýrt af körlum.

Niðurstöðurnar sýna að nánast allar sögur sem við horfum á á hvíta tjaldinu eru eftir karla. Kvikmyndir eiga að spegla ólíka reynsluheima og það að fólk kynnist aðeins sögum karla gefur mjög skakka mynd af samfélaginu. Stóra verkefni kvikmyndaiðnaðarins eins og hann leggur sig er að minnka þetta kynjabil, við getum ekki haft þetta svona lengur,“ segir Fríða Rós Valdimarsdóttir, formaður Kvenréttindafélags Íslands, sem greinir frá niðurstöðum rannsóknarinnar.

Í dag býður Kvenréttindafélag Íslands, WIFT á Íslandi, Stockholms feministiska filmfestival ásamt Stockfish Film Festival til samræðna í Bíói Paradís um kynjabilið í kvikmyndaiðnaðinum undir yfirskriftinni „Hvað er svona merkilegt við það? Kynjabilið á hvíta tjaldinu“.

Dögg Mósesdóttir, formaður WIFT á Íslandi, segir niðurstöðurnar sláandi.

„Þetta kom mér mjög á óvart, ég hélt þetta væri ekki svona rosalega slæmt. Þetta er samt staðan í heiminum í dag þó að í Svíþjóð hafi hlutfallið verið skárra. Leiðin út úr þessu er aukin meðvitund og umræður. Bíóhúsin þurfa að setja upp kynjagleraugun. Það er ábati af því fyrir alla. Myndir eftir og um konur hafa til dæmis verið söluhæstar í Bandaríkjunum í ár. Þar er að aukast meðvitund með góðum árangri,“ segir Dögg. Mikilvægt sé að gefa konum tækifæri til inngöngu í iðnaðinn.

„Ég veit að stóru myndverin í Bandaríkjunum eru að þjálfa konur upp. Þar af er ein íslensk kona, Tóta Lee, sem fær þjálfun til þess að leikstýra risastórum kvikmyndum.“

Dögg segir jákvæð teikn á lofti og vonast til þess að niðurstöður á næsta ári verði betri konum í vil. Þáttaröðin Fangar sem sýnd var á RÚV þykir henni hafa verið til fyrirmyndar og nýjar reglur hjá Kvikmyndasjóði lofi góðu.

„Konur eru að gera fullt af myndum og nú verður unnið eftir nýju kvikmyndasamkomulagi hjá Kvikmyndasjóði um að það eigi að úthluta jafnt til karla og kvenna og taka tillit til kynjabilsins við mat á umsóknum,“ segir Dögg.

Fréttin birtist fyrst í Fréttablaðinu