Háskólakennarinn ekki ógn við almannaheill

„Dómarinn taldi brotin ekki þess eðlis að almannahagsmunir krefðust áframhaldandi gæsluvarðhalds," segir Oddgeir Einarsson, lögmaður háskólakennarans sem ákærður er fyrir kynferðisbrot gegn níu börnum. Hann telur líklegt að háskólakennarinn verði látinn laus á mánudaginn.

Háskólakennarinn hefur þegar játað brot gegn þremur börnum sínum sem hann á með núverandi eiginkonu. Brot gegn tveimur uppkomnum börnum eru fyrnd. Hin brotin varða vini barna hans sem hann neitar að hafa brotið gegn.

„Það bendir allt til þess að hann verði látinn laus á mánudaginn," segir Oddgeir. Ríkissaksóknari áfrýjaði umsvifalaust úrskurði Héraðsdóms Reykjaness en Oddgeir telur ólíklegt að Hæstiréttur muni kveða upp úrskurð í málinu áður en gæsluvarðhaldið renni út á mánudaginn.

„Úrskurðurinn var kveðinn upp í gær og við kærðum hann þegar í stað," segir Ragnheiður Harðardóttir sem sér um málið hjá ríkissaksóknara. Að öðru leyti vildi hún ekki tjá sig um málið.

Fyrir liggur ítarlegt sálfræðimat á háskólakennaranum sem lagt var fram við meðferð málsins. Ragnheiður og Oddgeir vildu hvorug tjá sig um efni sálfræðimatsins - hvort þar kæmi fram að börnum gæti staðið hætta af háskólakennaranum eður ei.