Fóru á kostum í íslenska sendiráðinu í Moskvu

Íslenska Eurovision-föruneytið heldur áfram að heilla íbúa Moskvuborgar uppúr skónum með framkomu sinni. Á föstudagskvöldið var hópurinn þó á kunnuglegum slóðum.

Jóhanna Guðrún og félagar hafa tekið Eurovision-keppnina með trompi og Eurovision-spekúlantar eru flestir sammála um að það væri stórslys ef það kæmist ekki uppúr sínum undanriðli á þriðjudagskvöldinu. Hópurinn sletti aðeins úr klaufunum hjá íslenska sendiherranum í Moskvu, Benedikt Ásgeirssyni, og tók að sjálfsögðu lagið fyrir starfsmenn sendiráðsins.

Einna mestu kátínuna vakti þegar Jóhanna Guðrún fetaði í fótspor Regínu Ósk og söng hin ofurvinsæla Eurovision-slagara This is your life með Friðrik Ómari.

Annars getur ýmislegt gerst og sem betur fer var engin Íslendinganna nærri þegar gasleiðsla sprakk í nágrenni við Eurovision-svæðið aðfaranótt sunnudags. Hún heyrðist víða enda um töluvert öfluga sprengingu að ræða en samkvæmt fyrstu fréttum virðist engin hafa slasast þótt eldar hafi geisað í kjölfar hennar. Jóhanna Guðrún stígur síðan á stóra sviðið annað kvöld og þá verða örlög hennar í höndum annarra Evrópubúa og sérstakrar dómnefndar. -fgg