Varar íslensku þjóðina við Grínmúrarareglunni

„Þetta félag er svolítið eins og Sjálfstæðisflokkurinn, til að tryggja að félagsmenn séu í góðum stöðum og að þeim líði vel," segir Mið-Íslandsgrínarinn Dóri DNA um Íslensku Grínmúrararegluna.

Íslenska Grínmúrarareglan er aðilinn á bakvið dularfullt merki sem landsmenn hafa eflaust tekið eftir í lok Mið Íslands-þáttanna og Steindans okkar, auk þess sem það sést á óáberandi stað á vefsíðunni Flick my life. Þá er það væntanlegt á fleiri staði að sögn Dóra. „Það er verið að vígja inn fleiri meðlimi „as we speak" og það eru stór nöfn. Við erum búin að skapa okkur sess í sjónvarpinu og á netinu en nú ætlum við að færa okkur yfir í myndrænt, prentað grín," segir hann.

Aðspurður hvort reikna megi með að sjá menn eins og Hugleik Dagsson bera merkið segist hann hvorki geta játað því né neitað, enda sé þetta leynifélag. „Þeir vita að ég er að tala við þig um þetta og eru ekki sáttir. Allir meðlimir reglunnar myndu neita tilveru hennar staðfastlega, enda er það í lögum. Ég er því að brjóta lögin gróflega," segir Dóri og viðurkennir að hann óttist mjög afleiðingar þess brots síns að ræða regluna við blaðamann. „Ef næsta frétt sem þú skrifar er um dularfullt mannshvarf á stórum manni úr Vesturbænum þá veistu hvað hefur gerst og lögreglan veit þá hvar er rétt að byrja að leita," bætir hann við.

Blaðamaður hefur ekki farið varhluta af ógnum Grínmúrarareglunnar og fengið misalvarlegar hótanir frá hópnum eftir að hafa rætt við Dóra. „Þeir eru blíðir þegar það á við en eru óhræddir við að vera harðir þegar þess þarf. Yfirlýst markmið reglunnar er að stjórna gríni á Íslandi, sama hvað það kostar," segir Dóri og bætir við að reglulega séu haldnir fundir þar sem hernaðaraðgerðir séu planaðar. „Einu skilaboðin sem ég hef handa íslensku þjóðinni eru bara að passa sig, því við erum að skipuleggja okkur," segir hann.

Síðasti þáttur Mið Íslands verður sýndur á Stöð 2 í kvöld og verður spennandi að sjá hverju grínistarnir taka þar upp á. Þættirnir hafa hlotið misjafnar viðtökur en yfir 400.000 manns hafa skoðað vinsælasta atriðið þeirra, sem fjallar um Andrés Önd, á netinu.

tinnaros@frettabladid.is