Heiðingjar reiðir yfir Hómer Simpson

Heiðingjar í Bretlandi eru æfareiðir yfir 55 metra langri mynd af Hómer Simpson, sem hefur verið máluð á tún við hliðina á frægu frjósemistákni þeirra, Risanum í Cerne Abbas. Myndin af teiknimyndafígúrunni er liður í markaðsherferð vegna bíómyndar um Simpson fjölskylduna sem kemur út í næstu viku.

Risinn er kalkteikning af manni, sveiflandi kylfu með lim í fullri reisn. Hann er talinn vera frá sautjándu öld hið minnsta, líklega þó mun eldri. Hann er stærsta teikning sinnar tegunar í Bretlandi, skafinn gegnum tún í kalkstein. Nýr nágranni hans á næsta túni er öllu siðsamlegri á nærbuxum einum fata og veifandi risavöxnum kleinuhring.

Listamaðurinn Peter Stuart var fenginn til að mála myndina. Til verksins notaði hann vistvæna málningu sem mun að lokum skolast burt með rigningu

Talsmaður heiðingjafélagsins sagði við ABC fréttastofuna að auglýsingin væri algjör vanvirðing. Þetta væri staður sem fólki þætti vænt um og með þessu væri verið að gera lítið úr honum.