„Ég sting þig með fokking sprautunál“

24 ára karlmaður hefur verið ákærður fyrir að ráðast á tvo lögreglumenn, hóta þeim líkamsmeiðingum og fyrir vörslu fíkniefna. Málið er rekið fyrir Héraðsdómi Reykjavíkur.

Maðurinn er sakaður um að hafa aðfaranótt 17. ágúst 2013, eftir að hann var handtekinn í Austurstræti, rekið olnbogann í andlitið á lögreglukonu og skömmu síðar sparkað í brjóstkassann á lögreglumanni. Eftir flutning á lögreglustöðina við Hverfisgötu sömu nótt sparkaði hann í andlit þriðja lögreglumanns. Hafði maðurinn í fórum sér 0,98 grömm af amfetamíni.

Þá hótaði hann lögreglumanni í Hafnarfirði líkamsmeiðingum við handtöku þann 5. október 2013. Aftur var maðurinn með amfetamín í fórum sínum. Sagði ákærði við lögreglumanninn: „Ég sting þig með fokking sprautunál“ og í kjölfarið bætti hann við „Á ég að stinga þig?“

Er maðurinn bæði kærður fyrir brot á almennum hegningarlögum og sömuleiðis fíkniefnabrot.