Innlent

Milljarða fasteignir keyptar í Örfirisey

Ólafur Garðarsson
Ólafur Garðarsson

Fjárfestingafélagið Lindberg hf. hefur að undanförnu keypt fasteignir í Örfirisey að verðmæti næstum þriggja milljarða króna. Samtals er um að ræða á þriðja tug eigna.

Eigendur Lindbergs eru Ólafur Garðarsson, hæstaréttarlögmaður og umboðsmaður knattspyrnumanna, Gísli Steinar Gíslason, Magnús Jónatansson og Icebank hf. Á hver eigandi fjórðung í félaginu.

Ólafur Garðarsson segir félagið horfa til hugmynda meirihluta Sjálfstæðisflokks og Framsóknarflokks um framtíðaruppbyggingu byggðar í Örfirisey. „Land er í eðli sínu takmörkuð auðlind, og land í 101 Reykjavík er enn þá takmarkaðri auðlind heldur en flestar aðrar á höfuðborgarsvæðinu. Meirihlutinn í Reykjavík hefur lýst því yfir að það sé vilji til uppbyggingar íbúðabyggðar í Örfirisey.

Við [eigendur Lindberg hf.] teljum það nauðsynlegt, til þess að koma hreyfingu á málið, að koma eignum á þessu svæði á færri hendur. Það eru miklir möguleikar á þessu svæði og við vonumst til þess að koma málum í farveg framkvæmda með kaupum á þessu svæði. En auðvitað eru ákvarðanir í þessum skipulagsmálum í höndum kjörinna fulltrúa Reykjavíkurborgar," sagði Ólafur.

Fram kemur í málefnasamningi meirihluta Sjálfstæðis- og Framsóknarflokks að vinna skuli að skipulagningu byggðar í Örfirisey. Auk þess hefur starfshópur málin til skoðunar en í honum eru Björn Ingi Hrafnsson, sem jafnframt er formaður, Árni Þór Sigurðsson, Hanna Birna Kristjánsdóttir, Gísli Marteinn Baldursson og Dagur B. Eggertsson. „Við erum meðal annars að skoða hvernig staðið hefur verið að skipulagningu sambærilegra svæða erlendis.

Það liggur fyrir pólitískur vilji til þess að standa vörð um hafnarstarfsemi sem ekki stendur til að úthýsa úr vesturhöfninni. Við ætlum að skoða alla þætti, sem eru fjölmargir, er snerta þessi mál. Ég leyni því ekki að þessi viðskipti hafa verið hraðari heldur en við gerðum ráð fyrir og sýnir betur en nokkuð annað að það var rétt skref að setja þennan starfshóp á laggirnar því markaðurinn er oft á undan," sagði Björn Ingi.

Lindberg hefur meðal annars lagt fram 170 milljóna króna kauptilboð í húsnæði Tónlistarþróunarmiðstöðvarinnar sem er til húsa að Hólmaslóð 2. Jón Sævar Þorbergsson, sem séð hefur um fjármálahlið Tónlistarþróunarmiðstöðvarinnar, segir líklegt að húsnæðið verði selt en með því skilyrði að starfsemin fái að vera áfram í húsinu.

Hlutafélagið Raddir og bakraddir, sem Daniel Pollock og Jón Sævar eru meirihlutaeigendur í, á húsnæðið.

Flestar eignirnar sem Lindberg hefur keypt eru við Fiskislóð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.