Leoncie reynir fyrir sér í pólitík

Indverska prinsessan Leoncie er með mörg járn í eldinum, eins og endranær. Myndband hennar var sýnt í listasetrinu Scandinavia House í New York og hlaut dynjandi lófaklapp og þá hyggst hún feta nýjar brautir.

„Jú, þetta er rétt, ég hef alltaf haft mikinn áhuga á indverskum stjórnmálum og það komu að máli við mig menn frá nýju stjórnmálaafli og vildu fá mig til liðs við sig,“ segir Leoncie. Hún telur sig hafa mikið fram að færa í indverskum stjórnmálum sem að hennar sögn hafa einkennst af viðhorfum gamalla karla. Leoncie og eiginmaðurinn Victor hafa því verið á Indlandi að undanförnu og kannað jarðveginn fyrir framboð indversku prinsessunnar. Indland er fjölmennasta lýðræðisríki í heimi og stjórnmálin þar hafa oft verið æði skrautleg og blóði drifin.

En stjórnmálabaráttan yrði bara smá hliðarspor frá ástríðu Leoncie, sem er og verður alltaf tónlistin. Nýverið var myndband hennar Love Messages from Overseas sýnt í listamiðstöðinni Scandinavia House í New York og ekki var að sökum að spyrja, salurinn hreinlega ærðist af fögnuði. „Mér skilst að áhorfendur hafi risið úr sætum sínum og það ku ekki gerast oft þarna,“ segir Leoncie og upplýsir jafnframt að myndbandið muni væntanlega ferðast víðar um Ameríku.

Leoncie og Victor hafa komið sér vel fyrir í Essex, festu nýverið kaup á nýju húsi sem Leoncie segist engan veginn standast íslensk gæði. „Nei, húsin hérna í Bretlandi eru öll skökk, það er eins og þeir viti ekki hvað hallamál er,“ segir hún og hlær, bætir því við að það séu ekki bara hin vel byggðu híbýli sem hún sakni frá Íslandi, hana þyrstir í gott vatn og harðfisk.

„Enska vatnið er algjört sull, ódrekkandi.“ Hún upplýsir jafnframt að þau skötuhjú hafi látið af allri áfengisdrykkju, borði ekki rautt kjöt heldur bara fisk og grænmeti og það sé þegar farið að skila sér, Victor hafi grennst til muna og þeim líði mun betur á bæði líkama og sál.

- fgg