Jafntefli hjá Reading

Reading og WBA þurfa að mætast á ný eftir að liðin gerðu jafntefli, 2-2, í hörkuslag í dag.

Reading fékk algjöra draumabyrjun í leiknum því Jimmy Kebe kom þeim yfir á fyrstu mínútu leiksins.

Leikmenn WBA létu það ekki slá sig út af laginu og Robert Koren jafnaði leikinn á 18. mínútu.

Það blés svo ekki byrlega fyrir Reading þegar Shane Long var vikið af velli í upphafi síðari hálfleiks. Blessunarlega fyrir Reading fékk leikmaður WBA einnig rautt á 61. mínútu.

Simon Church hélt síðan uppteknum hætti í bikarnum þegar hann kom Reading yfir á 73. mínútu. Það dugði ekki til því Joe Mattock jafnaði skömmu fyrir leikslok.

Brynjar Björn Gunnarsson og Ívar Ingimarsson voru báðir í byrjunarliði Reading en Gylfi Þór Sigurðsson gat ekki leikið vegna meiðsla.

Birmingham er komið áfram eftir 1-2 sigur á Derby þar sem sigurmarkið kom á lokamínútu leiksins.