Björt segir enga töfralausn til í loftslagsmálum

Þingmenn voru sammála um mikilvægi loftslagsaðgerða þegar þeir ræddu nýja skýrslu umhverfisráðherra um stöðu og stefnu Íslands í loftslagsmálum.

Björt Ólafsdóttir, umhverfisráðherra, varaði við því að engin ein töfralausn væri til í loftslagsmálum þegar hún hóf umræður um skýrslu sínu á Alþingi í morgun.

Skýrslan dregur upp dökka mynd af stöðu Íslands í loftslagsmálum. Án meiriháttar inngrips á Ísland ekki eftir að standa við skuldbindingar sínar gagnvart Kyoto-bókuninni né Parísarsamningnum. Losun gróðurhúsalofttegunda á hvern Íslending sé nærri þrefalt meiri en gerist á heimsvísu, eins og kemur fram í frétt Fréttablaðsins um skýrsluna.

Ráðherrann lýsti skýrslunni sem viðvörun en jafnframt hvatningu. Íslendingar eigi fjölmörg tækifæri til að draga úr losun og auka bindingu. Margar aðgerðanna séu ódýrar og sumar skili hreinlega fjárhagslegum ávinningi.

„Við þurfum þó að skilja að það er engin ein töfralausn, ekkert eitt verkefni sem getur leyst allt. Við þurfum að sækja fram alls staðar þar sem við sjáum fram á árangur og forgangsraða aðgerðum sem eru hagkvæmastar og skila fjölbreyttum ávinningi,“ sagði Björt þegar hún fór yfir þær aðgerðir sem ráðast þyrfti í.

Hrósað fyrir hreinskiptni

Fulltrúar stjórnarandstöðunnar hrósuðu Björtu fyrir hreinskiptnina. Þannig sagði Kolbeinn Proppé, þingmaður Vinstri grænna, að nýr tónn kveði við í skýrslunni og samflokkskona hans, Rósa Björk Brynjólfsdóttir, sagði að skýrslan dragi enga fjöður yfir að stjórnvöld hafi verið værukær í loftslagsmálum og aðgerðum.

Rósa Björk sagðist engu að síður efast um að allir ráðherrar ríkisstjórnarinnar gengu í sama takti og umhverfisráðherrann. Spurði hún hvort að allir ráðherrarnir væru sammála yfirlýsingu í stjórnarsáttmálanum að ekki yrðu gerðir fleiri ívilnandi samningar um stóriðju. Þá benti hún á að Sigríður Á. Andersen, dómsmálaráðherra, hefði nýlega skrifað grein í Morgunblaðið þar sem hún hreinlega varaði við grænum sköttum. Björt hefur meðal annars talað fyrir þeim til að draga úr losun.

Líti til heildaráhrifa stóriðju

Þó að þátttakendur í umræðunni úr öllum flokkum væru sammála um mikilvægi aðgerða og lofuðu skýrslu umhverfisráðherra gerði Sigurður Ingi Jóhannsson, þingmaður Framsóknarflokksins og fyrrverandi forsætisráðherra, athugasemd við að lítið væri gert úr aðgerðaáætlun ríkisstjórnar hans í loftslagsmálum.

Fullyrti Sigurður Ingi að það hefði verið fyrsta heildstæða áætlun Íslands í loftslagsmálum sem byggði á fjármögnuðum verkefnum.

Þá benti hann á mikilvægi þess að huga að loftslagi í öðrum málum, þar á meðal þegar kæmi rammaáætun, að flutningskerfi raforku og hugmyndum um að selja raforku til Evrópu um sæstreng.

Varaði hann sérstaklega við áhrifum þess að hafna frekari stóriðjuuppbyggingu.

„Verður þá afleiðingin sú að það verður farið í slík verkefni á öðrum svæðum, annars staðar í heiminum þar sem nýtt eru kolaver? Hver eru þá heildaráhrifin á loftslagsmál í heiminum?“ sagði Sigurður Ingi.